Michalevič pra sustreču ź Mierkiel: chto ŭ les, chto pa drovy 11

29 vieraśnia padčas sustrečy ŭ Varšavie fiederalnaha kanclera FRH Anhieły Mierkiel z pradstaŭnikami biełaruskaj apazicyi było adčuvańnie, što kali daviadziecca pracavać suprać jaje kamandy, to prajhrajem — u najlepšym vypadku jak BATE Barsiełonie.

Taki ŭzrovień prafiesijanalizmu adčuvaŭsia ŭ kožnym pytańni niamieckaha kanclera. Choć mnie zdałosia, što pryjšła spadarynia Mierkiel na sustreču, kab atrymać adkaz na svajo pytańnie: jak u Biełarusi mohuć adbycca źmieny. Ale adkazu tak i nie atrymała.

Pieršy raz ja «ŭžyvuju» naziraŭ za vystupleńniem Anhieły Mierkiel u kancy 1990-ch u niamieckaj vioscy pamiž Majncam i Koblencam. Jana vystupała niekalki hadzin z pramovaj dla Koła chryścijanska-demakratyčnych studentaŭ Hiermanii. Tady Mierkiel užo była hienieralnym sakratarom Chryścijanska-demakratyčnaha sajuza, i było vidać, što kali joj daduć šaniec uzyści na najvyšejšy niamiecki palityčny alimp, to jana hetym šancam paśpiachova skarystajecca.

Druhi raz ja słuchaŭ vystup užo kanclera Mierkiel na źjeździe niamieckaha Prafsajuza harniakoŭ, chimikaŭ i enierhietykaŭ. Sam fakt, što jana pryjechała vystupać sa šmathadzinnaj pramovaj u niepryjaznaje asiarodździe (prafsajuzy ŭ Hiermanii tradycyjna padtrymlivajuć sacyjał-demakrataŭ), šmat što tłumačyć u niamieckaj palitycy.

Zhody nie było, ale byŭ realny dyjałoh z pytańniami i adkazami, i heta było zusim nie padobna da biełaruskaha palityčnaha teatra adnaho aktora.

Dla Chryścijanska-demakratyčnaha sajuza pieršyja niekalki hadoŭ svajho kiravańnia ŭ partyi Anhieła Mierkiel była dosyć mocnym razdražnialnikam. Pa-pieršaje, jana pieršaja žančyna — staršynia CHDS. Pa-druhoje, jana z uschodniaj Hiermanii, a ŭ CHDS bolšaść siabraŭ i pa kolkaści, i pa ŭpłyvie pradstaŭlajuć zachodniuju Hiermaniju. Pa-treciaje, jana nie tolki pratestantka, ale navat dačka pastara, što ŭ CHDS, dzie mocnyja ŭpłyvy katalickaha poŭdnia, zusim nie vitajecca. Pry hetym Anhieła Mierkiel, jakaja pryjšła da ŭłady ŭ partyi z dapamohaj ŭpłyvovaha patrona — Hielmuta Kola, u nastupnyja hady nie tolki zachavała pasadu staršyni partyi, ale i voś užo niekalki kadencyj kiruje Hiermanijaj. Usio heta ja apisvaju, kab było razumieńnie: dla našych palitykaŭ sustrečy z takimi ludźmi — heta jak dla futbolnych kamand Biełarusi matč z najlepšymi kamandami Bundeślihi.

Škada, što Biełaruś na hetaj sustrečy pakazała siabie nie najlepšym čynam.

Pieršy vystupoŭca, były kandydat u prezidenty, nie tolki nie skazaŭ ni słova pra palityčnych źniavolenych, ale navat skazaŭ, što situacyja našmat lepšaja, čym mahła b być, i pierajšoŭ u svajoj pramovie na ekanomiku. Naturalna, jamu zapiarečyli, što adrazu pakazała ŭnutranyja kanflikty ŭ našaj asiarodździ. Staršynia AHP Anatol Labiedźka, sprabujučy prademanstravać adzinstva ŭ padychodach, pradstaviŭ stratehiju z troch punktaŭ, dzie paśla vyzvaleńnia palitviaźniaŭ prapanujecca pierajści da arhanizacyi svabodnych vybaraŭ. Ale my tak i nie zmahli vyrazna adkazać na pytańnie, čamu Łukašenka, hublajučy padtrymku, pavinien na hetyja vybary pahadzicca.

Mnohija biełaruskija ŭdzielniki sustrečy sprabavali vystupać pa 2–3 razy da taho, jak hołas dachodziŭ da astatnich, i heta nahladna demanstravała, što ŭ zale sabralisia kankurenty, a nie partniory.

Mnie daviałosia pieršamu havoryć pra važnaść chutkaj reakcyi Hiermanii na ŭsie fakty cisku na Andreja Sańnikava, Mikałaja Statkieviča i Dźmitryja Daškieviča, choć da taho ja byŭ upeŭnieny, što pierada mnoj hetyja pytańni ŭžo šmat razoŭ padymuć.

Uvohule, adčuvałasia niepadrychtavanaść našaj delehacyi da takich sustreč.

Znoŭ čuŭ dziasiatki paralelaŭ i paraŭnańniaŭ, naprykład, pra kamunalnuju kvateru, adnak hety vobraz našym kaleham z Hiermanii ničoha nie kaža i tolki stvaraje toj samy vobraz «zahadkavaj słavianskaj dušy», jaki na narmalnaj movie nazyvajuć nieadekvatnaściu.

U svaju čarhu kancler Hiermanii prademanstravała vysoki ŭzrovień razumieńnia situacyi, abmiarkoŭvajučy temu ŭpłyvu Rasii. Pry hetym jana vykazała mierkavańnie, što prablema, biezumoŭna, nie tolki ŭ Łukašenku, ale i ŭ našym uschodnim susiedzie.

Demanstratyŭna pieradajučy pryvitańnie Alaksandru Milinkieviču praź jaho namieśnika Jurasia Hubareviča, spadarynia Mierkiel nahadała, što byŭ čas, kali biełaruskija demakratyčnyja siły mieli svajho efiektyŭnaha pradstaŭnika, i, daviedaŭšysia, što Milinkievič nie zmoh pryjechać u suviazi z prablemami sa zdaroŭjem, pažadała jamu najchutčejšaha vyzdaraŭleńnia.

Pryjemna, što siońnia ŭ asobie Hiermanii biełaruskija demakratyčnyja siły majuć mocnaha sajuźnika. Pra novuju palityku Hiermanii ŭ dačynieńni da Biełarusi mnie ŭžo davodziłasia pisać.

Sustrečy lidaraŭ apazicyi z najvyšejšymi kiraŭnikami Hiermanii — heta nie prosta realizacyja ahučanaj novaj palityki. Heta, što nazyvajecca, demanstracyja padtrymki «na vyrast». A voś ci ŭ stanie my stać mocnym partnioram dla našaha zachodniejeŭrapiejskaha sajuźnika — pakaža čas.

Aleś Michalevič, naviny.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH