Zatrymali sacyjołaha Manajeva, jaki vyjaviŭ padzieńnie rejtynhu Łukašenki da 20% 24

photo.bymedia.by

Zasnavalnik Niezaležnaha instytuta sacyjalna-ekanamičnych i palityčnych daśledavańniaŭ (NISEPD) Aleh Manajeŭ adpuščany ź milicyi, dzie jaho pratrymali prykładna try hadziny. Ciapier Manajeŭ rychtuje śpiecyjalnuju zajavu z nahody svajho zatrymańnia.

Jak paviedamiŭ jaho kaleha Alaksandr Sasnoŭ, zatrymańnie adbyłosia siońnia prykładna ŭ 15.10 na płoščy Pieramohi. Pavodle słoŭ Sasnova, jon patelefanavaŭ Manajevu i toj adrazu paviedamiŭ: «Mianie tut zatrymlivaje AMAP, šukaje zbroju i narkotyki, chočuć niekudy vieści».

U milicyi Manajeva pratrymali kala troch hadzin i, pavodle mierkavańnia Sasnova, ułady takim čynam chacieli pieraškodzić udziełu sacyjołaha ŭ zapłanavanym mierapryjemstvie z udziełam dypłamataŭ.

Manajeŭ nakiroŭvaŭsia ŭ pasolstva Polščy ŭ Biełarusi, dzie ŭ jaho była pryznačanaja sustreča z pasłom.

U pasolstvie Polščy, jakaja staršynstvuje ŭ ES, Manajeŭ pavinien byŭ pradstavić na prezientacyi vynik apošniaha — vieraśnioŭskaha — daśledavańnia NISEPD. Jak paviedamiŭ BiełaPAN pres-sakratar pasolstva Pavieł Marčuk, prezientacyja ładziłasia dla zamiežnaha dypłamatyčnaha korpusa i była pryznačana na 15.30, adnak prykładna za 15 chvilin da pačatku stała viadoma ab zatrymańni Manajeva, i mierapryjemstva daviałosia adkłaści.

Prezientacyja budzie arhanizavana «ŭ luby inšy zručny dla Aleha Manajeva čas», skazaŭ pres-sakratar.

«Dypłamaty majuć prava zaprašać luboha čałavieka, naša prava — viedać ab situacyi ŭ dziaržavie, u jakoj my pracujem. My zaprasili prafiesara Manajeva jak šyroka viadomaha vučonaha — nie my pieršyja, nie my apošnija. Za čverć hadziny da sustrečy prafiesara aryštoŭvajuć. Jakaja pryčyna dla hetaha aryštu? Nie mahu sabie ŭjavić», — dadaŭ Marčuk.

Varta zaznačyć, što zhodna ź vieraśnioŭskim nacyjanalnym daśledavańniem NISEPD, davier biełarusaŭ da kiraŭnika dziaržavy za apošnija dzieviać miesiacaŭ źniziŭsia ŭ dva z pałovaj razu. Pavodle źviestak apytańnia,

Alaksandru Łukašenku daviarajuć tolki 24,5% respandentaŭ, nie daviarajuć — 62,3%.

Bolšaść apytanych taksama zajavili, što ličać prezidenta vinavatym u ekanamičnym kryzisie ŭ Biełarusi.

NISPD — najstarejšy ŭ Biełarusi niedziaržaŭny daśledčy centr, stvorany ŭ lutym 1992 hoda hrupaj vučonych, žurnalistaŭ, palitykaŭ i biźniesmienaŭ.

Asnoŭnymi vidami dziejnaści NISEPD źjaŭlajucca: daśledavańni ŭ śfiery sacyjałohii, ekanomiki i palitałohii; infarmacyjna-kansultacyjnaja dziejnaść; praviadzieńnie kanfierencyj i sieminaraŭ; vydavieckaja dziejnaść; prafiesijny treninh. Da lipienia 2006 hoda NISEPD uznačalvaŭ doktar sacyjałahičnych navuk, prafiesar Aleh Manajeŭ. U krasaviku 2005 hoda instytut byŭ likvidavany pa rašeńni Viarchoŭnaha suda Biełarusi i paźniej zarehistravany ŭ Litvie jak hramadskaja ŭstanova. Zaraz dyrektaram instytuta źjaŭlajecca doktar fiłasofii Alhirdas Dziehucis.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH