Arhanizatary Narodnaha schodu i supołka «Revalucyja praz sacyjalnuju sietku» mianiajuć farmat praviadzieńnia akcyjaŭ: narodnyja schody planujecca sklikać u dvarach, a maŭklivyja akcyi ŭžo adbyvajucca ŭ formie fotaakcyjaŭ.
Stvaryć sietku schodaŭ i strukturaŭ samaarhanizacyi hramadzianaŭ — takuju metu staviać inicyjatary Narodnaha schodu.
12 listapada ŭ Miensku ludzi pryjduć na płošču Banhalor, a schody ŭ dvarach mohuć raspačacca ŭžo na nastupnym tydni, adznačaje Viktar Ivaškievič.Na schodach pa miescy žycharstva buduć abirać ludziej u arhkamitet Narodnaha schodu.
«My prapanujem ludziam razam rabić, a nie zamiest ich. Dałučajciesia, davajcie razam pracavać — voś heta naša hałoŭnaje pasłańnie. Pravodźcie schody, źbirajcie svaich susiedziaŭ, svaich supracoŭnikaŭ, znajomych. Ahitujcie, kab jany dałučalisia da hetaj pracy praz raspaŭsiud infarmacyi i praviadzieńnie lakalnych schodaŭ jak formy samaarhanizacyi ludziej. Heta toje samaje, jak u 89-m hodzie byŭ arhkamitet Narodnaha frontu, a potym stvaralisia supołki padtrymki. Supołkami padtrymki hetych patrabavańniaŭ, jakija pryniatyja 8 kastryčnika, pavinny być voś hetyja schody pa dvarach, pa rajonach, pa damach, pa vulicach».
Supołka «Revalucyja praz sacyjalnuju sietku», viadomaja svaimi maŭklivymi akcyjami pratestu na centralnych vulicach Miensku, pamianiała farmat akcyjaŭ.
Ciapier kožny achvotny moža arhanizavać nievialikuju sustreču i zrabić seryju fatazdymkaŭ na fonie viadomych miescaŭ svajho horadu z pasłańniem da Łukašenki.Štodnia planujecca rabić pa adnym fatazdymku. «Pamiatajcie, tolki adsutnaść dumki i naša biaździejańnie dazvalaje Łukašenku chłusić, što ŭ našaj krainie ŭsio dobra».
Pavodle namieśnika staršyni ruchu «Za svabodu» Jurasia Hubareviča, razdražnieńnie ŭładaŭ vyklikajuć realna masavyja akcyi, kali vychodziać nie dziasiatki, a dziasiatki tysiač, što stvaraje realnuju niebiaśpieku.
«Tut adsutničaje adziny i samy važny składnik — žadańnie narodu pratestavać. Kali ludzi nie vychodziać na vulicy, kali jany svaju niezadavolenaść ciapierašniaj sytuacyjaj nie vylivajuć u adkrytyja pratesty, to jakuju b formu ni prapanavała biełaruskaja apazycyja albo aktyŭnyja moładzievyja hrupy, heta nie pryviadzie da realnych źmienaŭ sytuacyi. Kali hramadztva nie hatovaje pratestavać, to niemahčyma ŭvieś čas padmianiać saboj volu narodu. Taja para, jaki ciapier źbirajecca, rana ci pozna moža prarvać kacioł, jaki stvaryŭ siońniašni biełaruski režym».
Palitolah Alaksandar Kłaskoŭski adznačaje, što ŭładam nie daspadoby lubaja aktyŭnaść hramadzianaŭ i lubyja formy pratestu. Ale staŭka arhanizataraŭ na ŭzrastańnie masavaści akcyjaŭ nie apraŭdałasia.
«Najpierš tamu, što ŭłada svaim hrubym, zvyčajnym metadam, praz represii, źbiła hetuju patencyjnuju aktyŭnaść, chacia stupień niezadavolenaści siońniašniaj sytuacyjaj, ekanamičnaj i palityčnaj, u hramadztvie davoli vysokaja. Ja dumaju, što heta razumnaje rašeńnie, bo vyvodzić žmieńku ludziej, kab ich tut ža chapali i karali sutkami, štrafami — nierazumna. Niachaj pulsuje hetaja aktyŭnaść u adnosna biaśpiečnych formach, a kali budzie niejkaja pikavaja sytuacyja, napružańnie, to hetyja sučasnyja technalohii, kali kazać pra sacyjalnyja sietki, spracujuć».
Pavodle Kłaskoŭskaha, farmat Narodnaha schodu «pa dvarach» — heta zmušanaje adstupleńnie.
«Faktyčna heta pa śladach toj ža „Revalucyi praz sacyjalnuju sietku“. Heta taki niežyćciazdolny farmat, bo mała chto budzie vychodzić. I razam z tym u nas šmat specsłužbaŭ i siłavych struktur, kab kantralavać heta i ŭ niejkich lakalnych farmatach».
