Ab hetym Alaksandr Łukašenka zajaviŭ na sustrečy z udzielnikami pasiadžeńnia Rady PA ADKB.
Na dumku Łukašenki, varta źviarnuć surjoznuju ŭvahu na sučasnuju infarmacyjnuju prastoru, pakolki «tolki ślapy nie bačyć, što tam adbyvajecca». «Infarmacyjnaja prastora vykarystoŭvajecca pa asobnych napramkach jak sproba destabilizavać situacyju ŭ tych ci inšych dziaržavach», — śćviardžaje Alaksandr Łukašenka. U jakaści prykładu jon pryvioŭ padziei ŭ arabskim śviecie, dzie, śćviardžaje jon, paśla revalucyj situacyja zusim nie palepšała. Naprykład, na niadaŭnich vybarach u Tunisie pieramohu atrymali radykalnyja isłamisty, zajaviŭ jon. [Red. Partyja Adradžeńnia, jakaja pieramahła ŭ Tunisie, heta musulmanski anałah jeŭrapiejskich chryścijanskich demakrataŭ, jana zajaŭlaje pra žadańnie zbudavać u Tunisie demakratyju tureckaha ŭzoru.]
«Dumać ab tym, što heta daloka ad nas i nas nie datyčyć, nielha.
Ale i dumać ab tym, što my dryžym pierad hetymi «sietkami» i hetak dalej, taksama nielha. U Biełarusi heta pakazvajuć»,— kanstatavaŭ Alaksandr Łukašenka.
Pavodle jaho słoŭ, na praciahu hetaha hoda ŭ Biełarusi nie raz rabilisia sproby destabilizavać abstanoŭku, u tym liku z vykarystańniem Internetu i sacyjalnych sietak. «My navučylisia zmahacca z hetym złom, i my damovilisia ab tym, što pavinny kaardynavać našy namahańni», — padkreśliŭ Alaksandr Łukašenka. «Tut niama nijakaha strachu, tut niama nijakich zabaron.
My ni ŭ jakim vypadku nie zakryvajem Internet, błohi, staronki ŭ sacyjalnych sietkach. My nikomu nie procidziejničajem. Kali łaska, havarycie, abmiarkoŭvajcie. Ale kali heta procizakonnaje dziejańnie, my adpaviednyja miery prymajem»,— skazaŭ kiraŭnik dziaržavy.
Alaksandr Łukašenka adznačyŭ, što lidary krain ADKB damovilisia abmieńvacca vopytam pa abaronie svajoj infarmacyjnaj prastory.
