31 kastryčnika na pasiadžeńni ŭ Viarchoŭnym sudzie pa spravie mahčymych terarystaŭ u jakaści śviedki była dapytana byłaja kłasnaja kiraŭnica Dźmitryja Kanavałava, jakaja vykładała ruskuju movu i litaraturu, Lidzija Piatrova.
Pavodle jaje słoŭ, Kanavałaŭ zapomniŭsia joj «padkreślena elehantnym», zaŭsiody byŭ u harnitury, tuflach, akuratna padstryžany. «A vonkavy vyhlad — heta adlustravańnie ŭnutranaha śvietu», — skazała jana.
Piatrova adznačyła, što Kanavałaŭ byŭ vychavanym, nikoli nie dapuskaŭ hrubaści ŭ dačynieńni da nastaŭnikaŭ, cikaviŭsia chimijaj i historyjaj. U škole Piatrova kiravała teatralnym hurtkom, chacieła pryciahnuć da ŭdziełu Kanavałava, ale zrabić heta joj nie ŭdałosia.
Piatrova skazała, što Kanavałaŭ byŭ ubaku ad adnakłaśnikaŭ. Jana pryhadała vypadak, kali była vielmi ździŭlena: jon razam z adnakłaśnikami pryjšoŭ naviedać jaje doma paśla ciažkaj apieracyi. Piedahoh źviarnuła ŭvahu na toje, što kłas «H», u jakim vučyŭsia Kanavałaŭ, byŭ kłasam «roŭnych troječnikaŭ, apošnim na paraleli». Na jaje dumku, Kanavałava heta mocna pryhniatała.
Uładzisłaŭ Kavaloŭ Piatrovaj nie zapomniŭsia, siarod inšych vučniaŭ jon nijak nie vyłučaŭsia. Pry hetym, na dumku nastaŭnika, Kavaloŭ, u adroźnieńnie ad Kanavałava, «byŭ blizki ŭ kłasie da chłopčykaŭ, jamu ŭ kłasie było praściej i lahčej».
Kavalova jana nazvała pasłuchmianym, nieahresiŭnym i niahrubym.Asablivaha siabroŭstva pamiž Kanavałavym i Kavalovym u škole jana nie zaŭvažała.
Nastaŭnica raskazała, što adnosiny pamiž baćkam i maci Kanavałava byli składanyja, ale adkul u jaje takaja infarmacyja, jana nie pamiataje. Baćkoŭskija schody ŭ škole rehularna naviedvała maci Kanavałava.
Piatrova ličyć, što «bolš ciopłyja i blizkija adnosiny ŭ Dzimy byli z mamaj».
