Brescki rajonny sud vynies rašeńnie 15 listapada. Zhodna ź im, brašura pryznanaja ekstremisckaj. Ciaham dziesiaci dzion aŭtarka moža abskardzić takoje rašeńnie. Ale, jak zajaviła spn. Alena, rabić hetaha nie źbirajecca.
«Jano było vyniesiena jašče da taho, jak rašeńnie ahučyŭ sud. Ja razumieju, što ŭ hetych ludziej niama mocy suprać KDB, jaki spuściŭ hety zahad».
Žančyna adznačaje, što kniha była pieradadziena staršyni KDB Vadzimu Zajcavu. A toj daručyŭ UKDB pa Bresckaj vobłaści pravieści jaje acenku. U vyniku było inicyjanavana sudovaje raźbiralnictva.
Zhodna z Zakonam «Ab supraćdziejańni ekstremizmu» rašeńnie suda źjaŭlajecca padstavaj dla źniščeńnia brašury.Ale spn. Alena adznačaje, što amal uvieś nakład 200 asobnikaŭ jana razasłała ŭ dziaržaŭnyja ŭstanovy, pieradała niekatorym palitykam.
Knihu pryznali ekstremisckaj na padstavie ekśpiertyzy, jakuju pravodzili ŭ Bresckim dziaržaŭnym univiersitecie. Hnauk ekśpiertyza nie zadavoliła. Joj prapanavali źviarnucca ŭ Akademiju navuk z prośbaj pravieści novuju ekśpiertyzu. Ale apłacić prapanavłai joj samoj. A heta 6 miljonaŭ rubloŭ. Hnauk admoviłasia.
Spn. Alena kaža, što z kantekstu vyrvali niekalki fraz i paličyli, što jany mohuć pryvieści da kanfliktu pamiž chryścijanami i musulmanami.Što ž u brašury znajšli ekstremisckaha? Jana prapahanduje vučeńnie tak zvanaha praroka Visaryjona.
«Aŭtar, źviartajučysia da musulman i chryścijan, sprabuje naviazać im ahulnuju misiju Visaryjona jak pasłańnika Boha na ziamli. Na praktycy prapanavany musulmanam novy i adnačasova stary prarok moža vyklikać vybuch abureńnia, pryvieści da niepradkazalnych nastupstvaŭ, stać asnovaj surjoznaha kanfliktu».
«Kniha ŭtrymlivaje šerah pramych i ŭskosnych pahroz, pačynajučy z «Hora tym, chto nie žadaje pieraradžacca!», «Hora tamu hramadstvu, dzie abaznačanyja staražytnym Piśmom durni buduć znachodzicca na tych miescach, adkul možna aktyŭna ŭdziejničać na śviadomaść bolšaści ludziej!»
Visaryjon (Siarhiej Torap) — zasnavalnik arhanizacyi «Carkva Apošniaha Zapavietu». Jaho vučni ličać Visaryjona druhim Chrystom. Šerah chryścijanskich cerkvaŭ ža nazyvaje «Carkvu Apošniaha Zapavietu» tatalitarnaj siektaj. Prychilniki Visaryjona źjazdžajucca ŭ Krasnajarski kraj Rasii, dzie sielacca pobač ź im. Biełaruskija ŭłady ličać hety ruch destruktyŭnaj płyńniu.
