Kancert Źmitra Vajciuškieviča ŭ minskaj kaviarni «Mistral» admienieny za niekalki hadzinaŭ da pačatku. Pra heta muzyčnamu partału «Tuzinu Hitoŭ» paviedamiŭ sam śpiavak: «Iznoŭ było telefanavańnie źvierchu, nas imknucca zahnać usio hłybiej u padpolle», — skazaŭ Źmicier. Dyrekcyja kaviarni fakt admieny mierapryjemstva paćvierdziła, biez tłumačeńnia pryčynaŭ.
Kancert u nievialičkaj kaviarni «Mistral» što na rahu Vaładarskaha i Marksa, mieŭsia adbycca ŭviečary 22 listapada. Mierapryjemstva asabliva nie rekłamavałasia — zała tam moža źmiaścić tolki z 50 čałaviek. Sa słovaŭ Źmitra, mierkavałasia, što projdzie «dušeŭny kancercik dla abranaj publiki». Kiraŭnictva kaviarni pajšło nasustrač, ale ŭsiaho za niekalki hadzinaŭ da pačatku niečakana paviedamiła vykanaŭcu, što mierapryjemstva pravieści niemahčyma.
«Iznoŭ było telefanavańnie źvierchu, z administracyi Leninskaha rajona. Nas imknucca zahnać usio hłybiej u padpolle, — zaznačaje vykanaŭca. — Vidać, treba jechać u Rasiju śpiavać šanson. Treba ž dumać, čym karmić dziaciej». Dniami Źmicier razam z žonkaj Halinaj Kazimiroŭskaj čakaje naradžeńnia dački.
