Načalnik adździeła pa spravach moładzi administracyi Kastryčnickaha rajona Viciebska Andrej Hieraščanka, jaki nabyŭ skandalnuju viadomaść paśla publikacyi šeraha antybiełaruskich materyjałaŭ, zvolnieny ŭ suviazi sa skančeńniem kantrakta.
«Sprava Hieraščanki» pačałasia paśla taho, jak čynoŭnik daŭ intervju rasiejskamu partału «Matierik», dzie razvažaŭ pra štučnaść biełaruskaj movy, kultury i admaŭlaŭ isnavańnie biełaruskaj nacyi, a Biełaruś nazvaŭ «jeŝio odnim russkim hosudarstvom».
Padobnyja vykazvańni dziaržaŭnaha słužačaha vyklikali rezkuju reakcyju kiraŭnika Administracyi prezidenta Uładzimira Makieja, i staršyni aficyjoznaha sajuza piśmieńnikaŭ, siabram jakoho źjaŭlajecca Hieraščanka, Mikałaja Čarhinca, jaki zajaviŭ, što «my budziem z takimi raspraŭlacca». U vyniku viciebski čynoŭnik byŭ adzinym na apošnim źjedzie praŭładnaha sajuza piśmieńnikaŭ, chto prahałasavaŭ suprać pierabrańnia byłoha milicejskaha hienierała staršyniom.
Andrej Hieraščanka zajaŭlaŭ, što ŭ lutym jamu paraili zvolnicca, adnak pa svaim žadańni jon sychodzić nie staŭ. Ciapier padobna na toje, što adeptu Vialikaj Rasii pryjdziecca pašukać novaje pracoŭnaje miesca zamiest utulnaha čynoŭnickaha kresła.
23 listapada jon atrymaŭ aficyjnaje uviedamleńnie, što administracyja Kastryčnickaha rajona spyniaje ź im pracoŭnyja stasunki z 26 śniežnia ŭ suviazi sa skančeńniem termina kantrakta.
