Sud Partyzanskaha rajona Minska 16 śniežnia zadavoliŭ pazoŭ padatkovaj inśpiekcyi ab spahnańni padatkaŭ z pravaabaroncy Valancina Stefanoviča.
Padčas sudovaha pasiadžeńnia Stefanovič śćviardžaŭ, što hrošy, jakija pieraličvalisia na jaho rachunak u litoŭskim banku, nie źjaŭlajucca jaho dachodam i nie padlahajuć padatkaabkładańniu. Srodki, jakija pastupali na jaho rachunak, pryznačalisia dla ažyćciaŭleńnia pravaabarončaj dziejnaści i dla pieradačy ich trecim asobam. Adnak sud paličyŭ, što Stefanovič nie padaŭ pierakanaŭčych dokazaŭ taho, što zamiežnyja fondy pieraličvali hrošy na jaho rachunak dla inšych asob. Akramia taho, sud adznačyŭ, što Valancin Stefanovič nie padaŭ kopii dahavoraŭ z zachodnimi fondami pra vykanańnie im
U suviazi z hetym sud vyrašyŭ, što iskavyja patrabavańni inśpiekcyi pa padatkach i zborach Partyzanskaha rajona Minska padlahajuć zadavalnieńniu.
Takim čynam, Stefanovič pavinien vypłacić padatak i pieniu na ahulnuju sumu 54 młn. 357 tys. 370 rubloŭ.
Razhlad pazovu inśpiekcyi Ministerstva pa padatkach i zborach Partyzanskaha rajona stalicy da Stefanoviča pačaŭsia 2 śniežnia. Pradstaŭniki inśpiekcyi ličać, što pravaabaronca pavinien byŭ płacić padachodny padatak z hrošaj, jakija pieraličvalisia jamu na rachunak u litoŭskim banku. U pačatku sudovaha pracesu padatkovaja inśpiekcyja Partyzanskaha rajona zajaviła chadajnictva ab pavieličeńni sumy isku da 43 młn. 474 tys. 110 rubloŭ, ź jakich padatak składaje 31 młn. 515 tys. 540 rubloŭ. Pry hetym pradstaŭniki inśpiekcyi spasłalisia na toje, što istotna vyrasła pienia pa niavypłačanych padatkach.
Paśla zakančeńnia sudovaha pasiadžeńnia Stefanovič zajaviŭ, što nie ličyć rašeńnie suda spraviadlivym i budzie abskardžvać jaho ŭ Minskim haradskim sudzie.
