Francuzskaja prakuratura admoviłasia pieraśledvać ministra ŭnutranych spraŭ Biełarusi Anatola Kulašova, jaki znachodziŭsia 17–20 studzienia ŭ Francyi ź vizitam pa linii Interpoła.
Pra heta paviedamiła pamočnica francuzskaha advakata Ŭiljama Burdona, jaki damahaŭsia aryštu ministra.
«Prakuratura zajaviła, što pamiž Francyjaj i Interpołam isnuje pahadnieńnie, zhodna ź jakim pradstaŭniki inšych dziaržaŭ, jakija biaruć udzieł u francuzskich sustrečach Interpoła, vałodajuć imunitetam»,— skazała pamočnica advakata.
«My, viadoma, z hetym nie zhodnyja, — padkreśliła jana. — Kanviencyja suprać katavańniaŭ pavinna pieravažać nad hetymi damoŭlenaściami».
Nahadajem, Burdon padaŭ sudovy pazoŭ suprać Kulašova ŭ Paryžy 19 studzienia. Dziejničajučy ad imia piaci biełarusaŭ, jon abvinavaciŭ ministra ŭ katavańniach.
Pamočnica Burdona nie skazała, čyje mienavita intaresy pradstaŭlaŭ advakat.Razam z tym hramadzianskaja inicyjatyva Free Belarus Now raspaŭsiudziła zajavu ab tym, što Burdon dziejničaŭ ad jaje imia. Inicyjatyva Free Belarus Now zasnavanaja siemjami apazicyjnych palitykaŭ i žurnalistaŭ, jakija byli aryštavanyja padčas razhonu demanstracyi 19 śniežnia 2010 hoda ŭ Minsku.
* * *
Biełaruskaja delehacyja na čale z Anatolem Kulašovym brała ŭdzieł u pieramovach, jakija prachodzili 17–20 studzienia ŭ Lijonie ŭ Hienieralnym sakrataryjacie Interpoła.
Ministr Kulašoŭ uklučany ŭ śpis biełaruskich čynoŭnikaŭ, jakim zabaronieny ŭjezd na terytoryju Jeŭrasajuza ŭ suviazi z parušeńniem u Biełarusi standartaŭ praviadzieńnia vybaraŭ.
Ale vizavyja sankcyi ES nie dziejničajuć u vypadkach, kali čynoŭniki naviedvajuć mierapryjemstvy mižnarodnych arhanizacyj.
