U stalicy stała prykmietna mienš maršrutnych taksi. U čym pryčyna hetaha? Na hetaje pytańnie adkazaŭ Valer Sasinoŭski, namieśnik načalnika płanava-kamiercyjnaha adździeła DU «Staličny transpart i suviaź» u intervju haziecie «Respublika».
— Na pačatku 2011 hoda ŭ Minsku naličvałasia 895 maršrutnych taksi, a na 1 studzienia 2012 hoda ich kolkaść skaraciłasia da 646. Aficyjnych pieravozčykaŭ za hod stała mienš na 29, zastałosia kala sotni, — kanstatuje Valer Sasinoŭski. — Asnoŭnaja pryčyna — rezkaje pavieličeńnie vydatkaŭ na ŭtrymańnie maršrutak. Vyraśli ceny na bienzin i zapčastki, a košt prajezdu davodzicca strymlivać — inakš ludzi prosta pierastanuć karystacca taksi. Pieršymi «zdalisia» samyja niepapularnyja maršruty, dzie pasažyraŭ i da kryzisu było mała. Potym pryjšłosia admaŭlacca ad maršrutaŭ «ad paroha da paroha», dzie pasažyry jeduć ad pieršaha prypynku da kancavoha, i ad tych, dzie mała ludnych prypynkaŭ.
Siarhiej Hrydziuška, dyrektar TAA «MT-Ekspres», člen praŭleńnia «Biełaruskaha sajuza transpartnikaŭ», zaŭvažyŭ: «646 — heta zajaŭlenaja kolkaść maršrutnych taksi. Na liniju ciapier realna vychodziać tolki 500—550 aŭtamabilaŭ, a napačatku 2010 hoda było bolš za 1000. Składana štości prahnazavać, ale, chutčej za ŭsio, sioleta źniknie jašče kala 10% pieravozčykaŭ.
