Viciebski pakutnik 33

Ja pad mocnym uražańniem ad pieršaha dnia suda nad Siarhiejem Kavalenkam. Pačućci źmiešanyja.

PAKUTNIK. Fota aholenaha źniasilenaha Kavalenki vyklikała asacyjacyju z kłasičnym tvoram Tycyjana «Śviaty Siebastyjan».

Pierahledzieła inšyja ŭvasableńni Śviatoha Siebastyjana ad roznych majstroŭ i pry źniešnim padabienstvie adnu roźnicu adznačyła. Kłasičnyja pakutniki hladziać u vyšyniu, źviartajucca da Boha. Kavalenka ci apuskaje hałavu ci hladzić na ludziej. Što i łahična – jakoje nieba, jaki Boh u kletcy ŭ sudovaj zale. Ale pačućcio pakutnictva ad hetaha nie źmianšajecca.

​​

REŽYSIOR. Kavalenka sam viadzie sudovy praces.

Dziakujučy jahonym učynkam za pieršy dzień suda amal nie adbyłosia pracesualnych dziejańniaŭ. Faktyčna Kavalenku ź niežadańniem padparadkoŭvajucca i maładyja sudździa i prakuror, i milicyjanty. Intelihientny Aleś Bialacki na sudzie sam pierakładaŭ chadu pracesu. Jak u «Žoŭnym piasočku» Bykava viaźni sami šturchali mašynu, jakaja paviazie ich na śmierć. Budaŭnik Kavalenka, jaki sam za kratami havoryć zbolšaha pa-rasiejsku, robić zaŭvahi pierakładčycy, školnaj nastaŭnicy biełaruskaj movy, i damahajecca jaje advodu i źmieny pierakładčyka. Paśpiavaje, jak mnie padałosia, na pačatku pasiedžańnia, dać instrukcyi žoncy, i jahonaja siamja niaspynna vyklikaje «chutkuju dapamohu», patrabujučy špitalizacyi palitviaźnia. Praces zaciahvajecca i stanovicca ŭsio bolš z adnaho boku absurdnym, a z druhoha – dramatyčnym.

BUDUČAJA ACHVIARA PRAPAHANDY. Rezkija, ekzaltavanyja pavodziny palitviaźnia, napeŭna, mohuć skarystać aficyjnyja ideołahi.

Chočacie ściaha? Chočacie biełaruskaj movy? Hladzicie, voś takija pryjduć i naviaduć svaje paradki.

NIE PALITYK. Kavalenka – prosty budaŭnik ź Viciebsku. Jon maje ideju. Jon apantany. Jon prahnie ekstrymu. Jon mocny. Jon lubić Biełaruś i bieł-čyrvona-bieły ściah.

Jon vyviešvaje ściahi. Jon ličyć heta svaim paklikańniem. Jon nie ŭmieje kazać pryhožych słovaŭ, nie viedaje, što takoje dypłamatyja. Heta jahonaja siła i jahonaja słabaść. Turemnaje pakarańnie, jakoje jamu pahražaje, absurdnaje. I jon zmahajecca. Adzin. Jak moža. Jak umieje.

PROSTA HIEROJ, skaža niechta. BŁAZAN, adkaža druhi. Siarhiej Kavalenka – palitviazień sučasnaj Biełarusi.

U im skancentravana ŭsio ciapierašniaje biełaruskaje – bol, adčaj, tupik, ahresija, supraciŭ, nianaviść i nadzieja.

Nadzieja, što jon vyjdzie z turmy.

Hanna Souś, radyjo «Svaboda»

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH