Biełaruś svoječasova i ŭ poŭnym abjomie vykanaje svaje abaviazacielstvy pa pahašeńni źniešniaha doŭhu. Pra heta zajaviła staršynia praŭleńnia Nacyjanalnaha banka Nadzieja Jermakova na pres-kanfierencyi 4 krasavika ŭ Minsku.
Pavodle jaje słoŭ, nivodny biełaruski bank nie praterminavaŭ nivodnaha centa zamiežnym bankam pa viartańni kredytu. "Praterminavanych daŭhoŭ u našych pradpryjemstvaŭ pierad zamiežnymi bankami taksama niama. Mahčyma, chtości zrabiŭ restrukturyzacyju doŭhu, damoviŭsia pra adterminoŭku na niejki pieryjad", — skazała jana.
"Što da našaha dziaržaŭnaha doŭhu, jaki my pavinny pahašać ź biudžetu, to tut taksama praterminovak niama, usio idzie dzień u dzień — jak nastaje termin, my ŭsio viartajem", — skazała bankir.
"Zmožam usio viarnuć. Naš bałans pa hetym hodzie praličvajecca z takim raźlikam, što ŭ nas zołatavalutnyja reziervy zastanucca na ŭzroŭni 1 studzienia 2012 hoda,i my spadziajemsia ich jašče i krychu pavialičyć, navat z ulikam nieabchodnaści viartańnia doŭhu", — dadała Jermakova.
Jana źviarnuła ŭvahu, što ŭmovy atrymańnia biełaruskimi subjektami haspadarańnia kredytaŭ zamiežnych bankaŭ dosyć žorstkija. "Usio praviarajecca piedantyčna. Prosta tak zamiežnyja banki nie dajuć hrošaj. Pavinny być zaklučeńni pa buchhałtarskich spravazdačach pavodle mižnarodnych standartaŭ, rejtynhi i hetak dalej", — padkreśliła kiraŭnik Nacbanka.
Pavodle jaje słoŭ, Biełaruś realna aceńvaje svaje mahčymaści pa pryciahnieńni źniešnich pazyk i ich viartańni. "My nie zmožam naraścić svaje abaviazacielstvy bolš, čym zdolnyja viarnuć. Nam prosta nie daduć naraścić svaje abaviazacielstvy bolš, čym my zdolnyja viarnuć", — rastłumačyła Jermakova.
Alaksiej Areška, BiełaPAN.
