Ministerstva pa padatkach i zborach Biełarusi nie razhladaje mahčymaść uviadzieńnia padatkaŭ na bahaćcie i biaździetnaść. Pra heta 14 červienia napres-kanfierencyi ŭ Minsku paviedamiŭ načalnik hałoŭnaha ŭpraŭleńnia padatkaabkładańnia fizičnych asob MPZ Michaił Rasolka.
«Mahu skazać adrazu — takija płany nie razhladajucca», — adznačyŭ pradstaŭnik ministerstva, dadaŭšy, što pytańnie padobnaha padatkaabkładańnia ŭžo dastatkova adrehulavana. Tak, u Biełarusi isnuje padatak na nieruchomaść, jaki, pa sutnaści, źjaŭlajecca adpaviednym padatkam na majomaść i zaležyć ad jaje koštu, heta značyć čym daražejšy abjekt nieruchomaści, tym vyšejšaja suma padatku.
«Kali našy hramadzianie majuć niejkuju darahuju nieruchomaść, adpaviedna ad jaje koštu i vypłačvajecca padatak. Tamu va ŭviadzieńni niejkaha dadatkovaha padatku na bahaćcie my nie bačym nieabchodnaści», — padkreśliŭ načalnik hałoŭnaha ŭpraŭleńnia padatkaabkładańnia fizičnych asob MPZ.
Pry hetym jon źviarnuŭ uvahu, što składanaści ŭ pytańni ŭviadzieńnia hetaha vidu padatkaabkładańnia jość u pryncypie, bo «treba jašče vyznačyć, jakoje heta bahaćcie, patrebny niejkija kryteryi». «Naprykład, možna mieć kvateru dzieści ŭ centry Minska, jakaja budavałasia ŭ paślavajennyja hady, dastałasia čałavieku ŭ spadčynu, ci piensijanier vałodaje. Ci budzie hety abjekt „bahaćciem“? Bo dla kahości heta prosta miesca žycharstva», — skazaŭ Rasolka.
Inšaja sprava, praciahnuŭ jon, kali razmova idzie pra acenku koštu majomaści. «Hetaje pytańnie my, u pryncypie, prapracoŭvajem, ale heta nie najbližejšaja pierśpiektyva. Heta davoli doŭhi praces, tamu što tut źviazana vielmi šmat viedamstvaŭ, vielmi składany praces acenki», — adznačyŭ pradstaŭnik MPZ.
