Lidar mižnarodnaj arhanizacyi «Małady front» (zarehistravana ŭ Čechii) Źmicier Daškievič, jaki znachodzicca ŭ hłybockaj kałonii № 13 (Viciebskaja vobłaść), zakončyŭ aznajamleńnie z materyjałami novaj kryminalnaj spravy. Ab hetym BiełaPAN paviedamiła namieśnik staršyni arhanizacyi Nasta Pałažanka.
«Ab tym, što Źmicier zakončyŭ znajomicca z materyjałami kryminalnaj spravy, ja daviedałasia ź lista ad jaho.
Heta aznačaje, što na praciahu miesiaca nad im moža adbycca sud», — skazała Pałažanka.
Pavodle jaje słoŭ, Daškieviča «vielmi paciešyła» charaktarystyka, jakuju dali jamu pry raspačynańni spravy. «Maŭlaŭ, jon nie paddajecca pieravychavańniu, admoŭna ŭpłyvaje na inšych źniavolenych i kirujecca svaimi intaresami. Jon krychu paśmiajaŭsia — dziŭna b było, kab u svaich pavodzinach jon kiravaŭsia čužymi intaresami», — skazała Pałažanka.
Nijakaj infarmacyi ab zdaroŭi Daškieviča ŭ liście niama.«Jon byŭ źmieščany ŭ miedčaść 24 lipienia z adnabakovaj pnieŭmanijaj, u paniadziełak, 6 žniŭnia, jamu pavinny byli zrabić zdymak, na padstavie jakoha pryniać rašeńnie, vypisvać jaho ci nie. 13 žniŭnia ja pajedu ŭ kałoniju, kab daviedacca ab jaho zdaroŭi», — skazała Pałažanka.
***
Nahadajem, 18 śniežnia 2010 hoda, napiaredadni vybaraŭ prezidenta, Źmitra Daškieviča i jaho tavaryša pa «Maładym froncie» Eduarda Łobava zatrymali ŭ stalicy pa abvinavačańni ŭ źbivańni dvuch minčan. 24 sakavika 2011 hoda Daškievič byŭ pryhavorany da dvuch hadoŭ pazbaŭleńnia voli ŭ kałonii ahulnaha režymu.
Niadaŭna ŭ dačynieńni da Daškieviča raspačali novuju spravu — pa č. 1 art. 411 KK (złosnaje niepadparadkavańnie patrabavańniam administracyi papraŭčaj ustanovy, jakaja vykonvaje pakarańnie ŭ vyhladzie pazbaŭleńnia voli).
U vypadku pryznańnia viny jamu pahražaje pazbaŭleńnie voli terminam da hoda. Ciapier Daškieviču zastajecca adbyć mienš čym piać miesiacaŭ pakarańnia.
.
