Milicyja choča pakłaści kaniec razhułu vuličnaha vandalizmu. Z hetaj metaj HUUS stvaryła ŭ sacyjalnaj sietcy «Vkontaktie» hrupu prychilnikaŭ pravaparadku
— Asnoŭnaj metaj hrupy źjaŭlajecca sumiesnaje supraćstajańnie niesankcyjanavanym hrafici ŭ Minsku, psavańniu haradskoj majomaści i inšym biedstvam ad ruk chulihanaŭ, — tłumačać u HUUS. — Miechanizmaŭ takoha supraćstajańnia moža być niekalki: udzielniki hrupy mohuć paviedamlać pra miescy, dzie naniesienaje hrafici ci dzie chulihany paškodzili majomaść. Dziakujučy takoj infarmacyi haradskija słužby adnoviać paradak. Mohuć zachavać i zatym apublikavać u hrupie momant ździajśnieńnia pravaparušeńnia. Paśla hetyja materyjały mohuć być vykarystanyja dla pryciahnieńnia parušalnika da adkaznaści. U sacsietcy źjaŭlajecca mahčymaść raskazać moładzi pra nastupstvy niepravamiernych pavodzinaŭ, što samo pa sabie moža ŭtrymać patencyjnych chulihanaŭ ad aktaŭ vandalizmu.
Letaś haradskim słužbam daviałosia zafarboŭvać niesankcyjanavanyja nadpisy na 4542 budynkach u Minsku. Škoda ad hrafitystaŭ skłała bolš za 100 młn rubloŭ.
Nie tak daŭno ŭłady stalicy pasprabavali nakiravać enierhiju vuličnych mastakoŭ u patrebnaje rečyšča: vyznačyli kala 100 abjektaŭ, jakija mohuć addać majstram hrafici. Heta ścieny budynkaŭ u roznych rajonach horada, a taksama dziciačyja placoŭki i śmiećcievyja kantejniery. Adnak dalej za ideju prajekt pakul nie prasunuŭsia.
