23 žniŭnia invalid-vazočnik z Babrujsku Siarhiej Mackievič adsudziŭ na svaju karyść ź miascovaha darožna-ekspluatacyjnaha pradpryjemstva 2 miljony rubloŭ kampensacyi maralnaj škody. Akramia taho, adkazčyk pavinien apłacić sudovyja vydatki j pasłuhi advakata ŭ sumie 3 miljonaŭ rubloŭ. Takoje rašeńnie pryniała sudździa Babrujskaha sudu Halina Ivańkova.
Nahodaj dla zvarotu Siarhieja Mackieviča ŭ sud stała jaho padzieńnie z vazkom pry sprobie adoleć prajeznuju častku na adnoj z babrujskich vulic. Pry padzieńni invalid pieršaj hrupy paškodziŭ siabie — pabiŭ hałavu, ruki i hrudnuju kletku.Tak paznačana ŭ medyčnaj daviedcy. Piešachodny pierachod, pa jakim Mackievič sprabavaŭ pierajści vulicu, jak vyśvietliłasia, nia byŭ prystasavany dla invalidaŭ. Jon namahaŭsia pierajści vulicu ŭ inšym miescy, dzie, jak jamu padałosia, byŭ prydatny źjezd z chodnika dla vazka. Na hetym źjeździe invalid i pierakuliŭsia.
Svaje maralnyja pakuty ad zdareńnia Siarhiej Mackievič acaniŭ u dziesiać miljonaŭ rubloŭ.Vyrakam sudździ Haliny Ivańkovaj pazoŭnik zastaŭsia zadavolenym:
«Sapraŭdy toje miesca, dzie ja pierachodziŭ, jano sapraŭdy było nie prystasavanaje. Dadzienaje rašeńnie sudździ paŭpłyvaje na toje, što ŭ žyłkamhasie j inšych instancyjach, ad jakich zaležyć vyrašeńnie takoha pytańnia, raspluščacca vočy. Infrastruktura haradoŭ i ŭstanoŭ nie prystasavanaja dla pierasoŭvańnia čałavieka na invalidnym vazku. Čynoŭniki, jakija prymajuć abjekty, nikoli nie sutykalisia z prablemami vazočnikaŭ», zaznačaje Siarhiej Mackievič.
Pradstaŭnik adkazčyka pryznaŭ, što piešachodny pierachod, pa jakim źbiraŭsia pierajści Mackievič, sapraŭdy, byŭ z parušeńniami normaŭ dla pierachodu invalidaŭ. Razam z tym, jon zajaviŭ, što zdareńnie adbyłosia nie na samim pierachodzie, a ŭ miescy, pryznačanym dla źjezdu techničnych transpartnych srodkaŭ.
Pavodziny invalida pradstaŭnik adkazčyka nazvaŭ hruba nieaściarožnymi i vinu za zdareńnie ŭskłaŭ na jaho ž.Jon dapuściŭ, što, kali b invalid pierakuliŭsia na piešachodnym pierachodzie, to žyllova-ekspluatacyjnaje pradpryjemstva biez pytańniaŭ zaklučyła b miravoje pahadnieńnie j vypłaciła kampensacyju. Pradstaŭnik adkazčyka prasiŭ sud nie zadavalniać pazovu Mackieviča.
Tym nia mienš, sudździa Halina Ivańkova dovady adkazčyka paličyła nieabhruntavanymi. Padzieńnie invalida na niepiešachodnym pierachodzie jana arhumentavała tym, što jon nia moh znajści inšaha miesca, kab pierajści vulicu. Maralnyja pakuty invalida sudździa vyznačała ŭ 2 miljony rubloŭ. Rašeńnie sudździ ŭstupić u siłu praź dziesiać dzion.
«Hetyja dva miljony dastavili mnie maralnaje zadavalnieńnie. Ja nie chaču ich vykarystoŭvać dla siabie.
Ja chaču pieradać hetyja dva miljony adnoj babrujskaj invalidcy-vazočnicy dla ŭźviadzieńnia pandusu z balkonu»,zajaŭlaje Siarhiej Mackievič.
Siarhiej Mackievič invalid pieršaj hrupy. U jaho paškodžany chrybiet. 23 hady jon u vazku. Jak jon adznačaje, amal usie babrujskija darohi nie prystasavanyja dla pierachodu invalidami. Z 600 vazočnikaŭ, pavodle jaho, tolki troje mohuć samastojna dabracca ŭ chatu i ź jaje. Žyćcio bolšaści ź ich prachodzić u miežach kvatery j dvara.
