Kali ruski patryjatyzm - źjava fundamientalnaja, dobra i pilna vyvučanaja pad roznymi vuhłami i sumiaščaje jak poŭnaje apraŭdańnie pierachodu na bok sapiernika, tak i kateharyčnaje admaŭleńnie dasiahnieńniaŭ cyvilizacyi - až da prava na zubnuju pastu, - to biełaruski patryjatyzm - śfiera maładaja, maładaśledavanaja i chavaje mnostva zahadak, mahičnych tajamnic i łahičnych pastak.
Jak užo było zajaŭlena raniej, biełaruski patryjatyzm małady, burnaje raźvićcio nabyŭ u apošnija hady. Jon maje dva najbolš raspaŭsiudžanyja typy: dziaržaŭny patryjatyzm (bujny) i bytavy patryjatyzm (cichi).Astatnija typy patryjatyzmu - «litvinstva», «nastalhija» (raspaŭsiudžanaja ŭ Izraili i ZŠA) i inšyja, nie mienš ekzatyčnyja, jak «patryjatyzm Sajuznaj dziaržavy», nie vychodziać za ramki statystyčnaj chibnaści.
Bujny patryjatyzm karaniami hłyboka siahaje ŭ Vialikuju Ajčynnuju vajnu, jakuju z astatnimi narodami śvietu, niahledziačy na padkopy i supraciŭ śpiecsłužbaŭ ZŠA, vyjhrała BSSR. Partyzany hnili ŭ ziamlankach i adčajna abaraniali svaju ziamlu. Jany stvaryli pieršy i druhi Biełaruskija Savieckija Sacyjalistyčnyja Franty. Nieŭzabavie «karyčnievaja čuma» była raźbitaja i całkam źniščanaja. Nami byli vyzvalenyja nastupnyja krainy ES (śpis papaŭniajecca i ŭdakładniajecca): Polšča, Hiermanija, Čechija, Słavakija, Litva, Łatvija i Kalininhradskaja vobłaść.
My viarnulisia da mirnaha žyćcia, adbudavali ŭsiu Zachodniuju Sibir, Ciumienskuju vobłaść, pakaryli calinu, kosmas i ŭdzielničali ŭ vykanańni internacyjanalnaha doŭhu ŭ Afhanistanie. Adnojčy my pračnulisia - i vyjaviłasia, što ŭsio stvoranaje našymi rukami, razburanaje.
My možam hanarycca nie terytoryjaj ad Bresta da Uładzivastoka, a ŭsiaho tolki abmiežavanaj prastoraj z talerantnym i pamiarkoŭnym narodanasielnictvam.
Razhublenaść i nastupnaje zakisańnie rozumaŭ paklikali da žyćcia siurrealistyčnyja vidziežy pra toje, jak BSSR nie puściła ŭ Jeŭrapiejski sajuz manhoła-tatarskaje jarmo.
Bujny patryjatyzm nie praduhledžvaje siabroŭ. Dla bujnaha patryjatyzmu isnujuć albo braty, albo vorahi pa ŭsim pierymietry.Bratam bujny patryjatyzm hatovy zrabić usio: arhanizavać pakazalnuju sielektarnuju naradu, pravieści «Słavianski bazar», zładzić demanstracyju apošniaj kalekcyi «Doma madelaŭ», pierakłaści i vydać (a ŭ niekatorych vypadkach navat napisać) narodny epas na adnoj z movaŭ, praduhledžanych našaj Kanstytucyjaj. Supravadžalnikam i čalcam aficyjnych delehacyj naležyć trochrazovaje haračaje charčavańnie, ekskursijnaje absłuhoŭvańnie i kamfartabielny adpačynak u adasoblenych damkach katedžnaha typu na bierazie adnaho z malaŭničych azioraŭ.
Kłasifikacyja vorahaŭ vahajecca ad niejtralnaj charaktarystyki «čužyja nam ludzi» da całkam prynižalnaj, jakaja vyklučaje pošuk kampramisaŭ i mahčymyja ŭ budučyni ahulnyja padychody: «palityka padvojnych standartaŭ».
Hałoŭny vorah - nie toj, chto adklučaje nam haz u marazy, zabaraniaje ekspart bijadyzielu, raspalvaje małočnyja, avijacyjnyja, rybna-kansiervavyja i cukrovyja vojny, hałoŭny naš vorah - abraźlivyja bieśpierapynnyja sproby atrymać z nas dadadzienuju vartaść.Hałoŭny vorah - naš imavierny sajuźnik. Nie sam, viadoma, nie biaskoncaja prastora, napoŭnienaja naftaj, hazam, inšymi karysnymi vykapniami, mietałurhičnymi kambinatami, nie rynak zbytu MAZaŭ, traktaroŭ «Biełaruś», pradukcyi małočna-tavarnych vytvorčaściaŭ i kaŭbasnych vyrabaŭ, nie finansavaja, resursnaja krynica.
Čužarodnaja, pryŭniesienaja zvonku i naviazanaja brackamu narodu ideałohija adkryta stavić zadaču źniavažyć, pastavić na kaleni, źniščyć samabytnuju ekanomiku, palityku, kulturu i navuku, razburyć za stahodździ sfarmavanyja ład i styl, narodnaść, sabornaść i vypakutavanyja potam i kryvioj našych baćkoŭ-dziadoŭ-vieteranaŭ šmatviektarnaść i pryncypy adnaho akna.
Pakinuć heta biespakaranym niemahčyma, patrabujecca štodzionnaja karpatlivaja tłumačalnaja praca na ŭsich napramkach i, viadoma ž, adpor.
Asnoŭnaja meta bujnaha patryjatyzmu - poŭnaja i kančatkovaja demaralizacyja.Vykarystoŭvajecca ŭvieś techničny arsienał: parady i demanstracyi, vinšavalnyja telehramy, pres-tury, naŭprostyja znosiny z narodam, pryznačajucca vybary, subotniki, śviaty «Dažynki» (štohod) i Usiebiełaruskija narodnyja schody (raz na piać hadoŭ). Utrymlivajucca Teatr opiery i baleta, niekalki televizijnych kanałaŭ, upraŭleńnie spravami, pamiežny śpiecnaz, ideałahičnaja viertykal, dvuchpałatny parłamient, Nacyjanalnaja škoła pryhažości i tvorčyja sajuzy: Sajuz piśmieńnikaŭ, Sajuz mastakoŭ.
Cichi patryjatyzm, abo bytavy - kampanienta padviedamnaha naroda, što zasialaŭ niekali adnu šostuju častku sušy, pa-zdradnicku razburanuju rosčyrkam piara ŭ Biełaviežskaj puščy.
Charakternyja rysy bytavoha patryjatyzmu - najaŭnaść ipateki, aŭtamabila, praca ŭ arhanizacyjach, častkova finansavanych za košt biudžetu, adpačynak u zdraŭnicach Jehipta i Turcyi, turystyčnyja vandroŭki ŭ «Akropalis» abo «Maksimu».
Z paniaćciem cichaha patryjatyzmu źviazanaja adčuvalnaja roźnica pamiž dvuma narodami-bratami: kali ruski narod – heta narod-bahanosiec, to my, hramadzianie, vybarščyki i padatkapłatniki sajuznaj dziaržavy, - nośbity bytavoha, časam dziaržaŭnaha, a ŭ niekatorych vyklučnych vypadkach - navat ruskaha patryjatyzmu:
- Pamrom, ale tanki na Maskvu nie prapuścim!
Ličycca, što cichi (bytavy) patryjatyzm moža vynieści na svaich plačach usio: inflacyju, devalvacyju, denaminacyju, adsutnaść indeksacyi ŭkładaŭ, suśvietny ekanamičny kryzis, jaki pryjšoŭ na abpalenuju Čarnobylem ziamlu, staršyniu Centralnaj kamisii pa praviadzieńni vybaraŭ i ŭsienarodnych hałasavańniaŭ (refierendumaŭ) i sami refierendumy.
