Mižnarodnaja kansałtynhavaja kampanija Wealth-X pradstaviła daśledavańnie World Ultra Wealth Report 2012–2013, u jakim padličyła kolkaść multymiljanieraŭ u roznych krainach śvietu.
Pavodle acenak analitykaŭ, u Biełarusi ciapier 115 multymiljanieraŭ, a ich majomaść składaje 13 młrd dalaraŭ.
U daśledavańni havorka idzie pra biznesoŭcaŭ, čyj kapitał pieravyšaje 30 młn dalaraŭ — u hrašach, akcyjach, nieruchomaści, pradmietach mastactva.
Rasija zaniała 9-je miesca, u joj 1145 multymiljanieraŭ, jakija vałodajuć kapitałam u 605 młrd dalaraŭ. Ukraina — 19-ja z 480 multymiljanierami i sukupnym kapitałam 55 młrd dalaraŭ. U Litvie i Łatvii multymiljanieraŭ mienš, čym u Biełarusi — u Litvie (31-je miesca ŭ ahulnym rejtynhu) ich 80, kapitał — 9 młrd dalaraŭ, u Łatvii (36-je miesca) — 65, kapitał — 8 młrd dalaraŭ.
U paraŭnańni z papiarednimi rejtynhami, jakija adlustroŭvajuć situacyju za 2011–2012 hady, kolkaść biełaruskich multymiljanieraŭ pavialičyłasia na 5 čałaviek (na 4%), a voś ich kapitał skaraciŭsia na 3,3%. U bolšaści krain, uklučajučy Hiermaniju, Rasiju i Ukrainu, adbyłosia skaračeńnie ultrabahatych ludziej.
Kolkaść jeŭrapiejskich multymiljanieraŭ źmienšyłasia na 1054 čałavieki, što na 1,9% mienš, čym było padčas papiaredniaha analizu World Ultra Wealth Report. U asnoŭnym padzieńnie adbyłosia za košt Ispanii, Francyi i Italii. Bahaćcie rehijonu źniziłasia na 190 młrd dalaraŭ, abo na 2,7%.
