26--28 kastryčnika litoŭskaja stalica na niekalki dzion pieratvorycca ŭ sapraŭdnuju biełaruskuju kulturnuju Mieku.Takoje ŭžo było adnojčy, kali «Krambambula» davała try kancerty zapar, ale hetym razam atrakcyjaj apošnich vychodnych kastryčnika stanie vialiki kancert samaha znakamitaha, ale, de-fakta, zabaronienaha ŭ Biełarusi hurta «Lapis Trubiackoj», jaki źbiare piacitysiačnuju zału «Pramogu Arena» (Ąžuolyno g. 9).
Kvitki na Lapisaŭ razyšlisia za 10 dzion.Tyja, kamu paščaściła ich nabyć, atrymajuć vydatnuju mahčymaść patrapić na prezientacyju novaha alboma «Rabkor». Kancert Lapisaŭ 27 kastryčnika stanie samym maštabnym biełaruskim kancertam u Litvie, a heta značyć, što Vilniu naviedaje niekalki tysiač biełarusaŭ!
Dom-drukarnia F. Skaryny (Didžioji g. 19, Ratušnaja płošča, Stary horad).
Miemaryjalnyja šyldy na budynku Biełaruskaj himnazii (unutrany dvoryk za carkvoj Sv. Trojcy)
Redakcyja «Našaj Nivy», Vilniaus g. 14
Łukišskaja płošča.
Zamkavaja hara ź viežaj Hiedymina.
Kaścioł sv. Michała (Šv. Mykolo 9)
Mohiłki «Rosy», pa druhi bok ad Staroha horada, za čyhunkaj.
Vilenski ŭniviersitet, Universiteto g. 3 (Stary horad, pobač z Prezidenturaj).
«Dom z tytanami», Traku g. 1 – Pylimo g. 26 (Stary horad).
Korpus EHU na Antokali.
U takoj situacyi, naturalna, možna čakać doŭhich čerhaŭ na miažy Biełarusi i Litvy, a tamu tyja, chto pakłapaciŭsia pra kvitki na ciahniki ci aŭtobusy da Vilni zahadzia, majuć šykoŭnuju mahčymaść fajna pravieści čas i paznajomicca z bahataj biełaruskaj historyka-kulturnaj spadčynaj litoŭskaj stalicy. U jakaści navihatara pa «biełaruskaj Vilni» možna skarystacca infarmacyjna-turystyčnymi daviednikami «Biełaruskija staronki Vilni», jakija svabodna dastupnyja ŭ siecivie pa hetaj spasyłcy. Daviedniki padrychtavanyja na biełaruskaj i litoŭskaj movach, kožny abjekt prailustravany i maje adpaviednyja paznaki na mapie.
Tym nie mienš, my padrychtavali dla vas TOP-10 biełaruskich miescaŭ u Vilni, jakija treba naviedać:
1. Dom-drukarnia Franciška Skaryny, u jakim znakamity biełaruski aśvietnik vydaŭ pieršyja knihi ŭ Vialikim Kniastvie Litoŭskim. Na fasadzie doma raźmieščanaja admysłovaja miemaryjalnaja doška.
Adras: Didžioji g. 19 (Ratušnaja płošča, Stary horad)
2. Kompleks Bazyljanskich muroŭ ličycca adnym z najbolš istotnych miescaŭ biełaruskaj historyi Vilni. Tut znachodzicca carkva Sv. Trojcy, pabudavanaja na zahad lehiendarnaha Kanstancina Astrožskaha ŭ padziaku Bohu za pieramohu nad maskoŭskimi vojskami pad Voršaj. Tut znachodzicca i były budynak Vilenskaj biełaruskaj himnazii, «nacyjanalnaj kuźni» biełarusaŭ-adradžencaŭ. Va ŭnutranym dvoryku možna pabačyć try miemaryjalnyja doški: Adamu Stankieviču, Maksimu Hareckamu i Natalli Arsieńnievaj. Taksama ŭ adnym z budynkaŭ hetaha manastyrskaha kompleksu siadzieli ŭ viaźnicy znakamityja fiłamaty i fiłarety Vilenskaha ŭniviersiteta.
Adras: uvachod praz Bazyljanskuju bramu z vulicy Aušros Vartų (unutrany dvoryk z carkvoj Sv. Trojcy)
3. Pačatak XX st., kali vychodziła hazieta «Naša Niva», byŭ nastolki istotnym časam dla biełaruskaha intelektualnaha žyćcia, što navat atrymaŭ nazvu, utvoranuju ad nazvy haziety, – «našaniŭski pieryjad». U Vilni vielmi šmat miescaŭ źviazanyja z historyjaj haziety «Naša Niva», ale lepš za ŭsio naviedać adnu z apošnich redakcyjaŭ na vulicy Vilenskaj, dzie visić miemaryjalnaja doška ŭ honar Janki Kupały – adnaho z najbolš vybitnych redaktaraŭ znakamitaj haziety.
Adras: Vilniaus g. 14
4. Łukišskaja płošča – vielmi trahičnaje miesca. Niahledziačy na toje, što tam štohod ładzicca śviatočny kirmaš na dzień Kaziuka, hetaja płošča ŭ pieršuju čarhu asacyjujecca z paŭstancami 1863 hoda i ich kiraŭnikom – Kastusiom Kalinoŭskim. Na płoščy ŭstalavany pamiatny kryž i miemaryjalnaja plita ŭ honar kiraŭnikoŭ paŭstańnia. Taksama my vielmi raim naviedać Muziej achviaraŭ hienacydu, jaki znachodzicca zusim pobač z płoščaj. Naviedniki muzieja mohuć patrapić u były śledčy izalatar NKUS-KDB. Imiony słavutych biełarusaŭ, takich jak Adam Stankievič ci Anton Łuckievič, naŭprost źviazanyja z hetym žudasnym miescam…
Adras: Łukišskuju płošču pierasiakaje praśpiekt Hiedymina. Idučy pa praśpiekcie ŭ supraćlehły bok ad Kafiedralnaj płoščy, možna vyjści na Łukiški praz 10 chvilin.
5. Zamkavaja hara ź viežaj Vierchniaha zamka – adna z najbolš znakamitych vilenskich vybitnaściaŭ. Vierchni zamak byŭ mocnym abarončym zbudavańniem časoŭ VKŁ i stahodździami padtrymlivaŭ biaśpieku stalicy litvinaŭ. Dla biełarusaŭ hetaje miesca znakamitaje jašče i tym, što tut znachodzicca imaviernaja mahiła Kalinoŭskaha, jakuju tak doŭha šukajuć daśledčyki. Taksama adsiul vy zmožacie pabačyć malaŭničyja krajavidy vilenskaha Staroha horada.
Adras: adšukać haru nie składana. Jana znachodzicca ŭ samym centry Staroha horada pobač z Kafiedralnaj płoščaj.
6. Kaścioł Śviatoha Michała – adno z samych znakamitych kultavych miescaŭ, źviazanych ź biełaruskaj historyjaj Vilni. Kaścioł pabudavany na zahad lehiendarnaha vilenskaha vajavody i stvaralnika Statuta VKŁ 1588 hoda Lva Sapiehi. Nadmahille Sapiehi i pa siońniašni dzień znachodzicca ŭ kaściole, ale sam budynak addadzieny pad muziej kaścielnaj spadčyny. Varta dadać, što ŭ časy nacysckaj akupacyi Vilni ŭ hetym kaściole pravodziŭ słužby znakamity biełaruski ksiondz Adam Stankievič, jaki paśla prychodu savieckich uładaŭ byŭ represavany…
Adras: kaścioł znachodzicca na vulicy Šv. Mykolo 9. Zusim pobač mieścicca znakamity hatyčny kaścioł Sv. Hanny i pomnik Adamu Mickieviču.
7. Vielmi raim naviedać i adzin z najstarejšych vilenskich niekropalaŭ – vilenskija mohiłki Rosy, dzie pachavanyja słavutyja biełaruskija nacyjanalnyja dziejačy, litaratary, śviatary, intelektuały. Poŭny śpis i mapu-schiemu vy možacie znajści ŭ daviedniku.
Adras: Rasu g. 32 (pa druhi bok ad Staroha horada, za čyhunkaj, 15-20 chvilinaŭ ad čyhunačnaha vakzała)
8. Nielha pakinuć biez uvahi i znakamity Vilenski ŭniviersitet. Kožny z nas – chto sa školnych padručnikaŭ, chto z navukovych krynicaŭ – viedaje pra hetuju navučalnuju ŭstanovu. Viadomaja i historyja tavarystvaŭ fiłamataŭ i fiłaretaŭ. Studentami hetaha ŭniviersiteta byli znakamityja Adam Mickievič, Teador Narbut, Tomaš Zan, Ihnat Damiejka, Jan Čačot dy inšyja.
Adras: Universiteto g. 3 (Stary horad, pobač z Prezidenturaj)
9. «Dom z tytanami» nam taksama nielha abminuć, jak nielha abminuć historyju hrafa Jaŭstacha Tyškieviča, ci historyju pačynalnika biełaruskaj litaratury Franciška Bahuševiča, ci historyju «Našaj Nivy». Hety budynak – pałac Tyškievičaŭ, albo «Dom z tytanami» – źviazvaje z historyjaj Biełarusi vielmi šmat. Tut znachodziłasia lehiendarnaja kalekcyja staražytnaściaŭ hrafa Jaŭstacha Tyškieviča, tut byŭ i Vilenski akruhovy sud, u jakim pracavaŭ lehiendarny Francišak Bahuševič. Niejki čas tut navat mieściłasia i redakcyja «Našaj Nivy» (1907 h.).
Adras: Traku g. 1 – Pylimo g. 26 (Stary horad)
10. Zaviaršajem naš TOP-10 łahičnaj suviaźziu pamiž minułym i sučasnym – Jeŭrapiejskim humanitarnym univiersitetam, jaki faktyčna źjaŭlajecca sučasnaj «biełaruskaj Miekaj» u Vilni. Miescam, dzie biełarusy zaŭždy zmohuć znajści padtrymku i prytułak. Miescam, dzie jany mohuć atrymać hodnuju jeŭrapiejskuju adukacyju. 27 kastryčnika ŭsie žadajučyja mohuć stać haściami na Dniach adčynienych dźviarej «Univiersiteckija vakacyi» ŭ EHU i daviedacca pra mahčymaści praciahu adukacyi ŭ Jeŭrapiejskim sajuzie. Mierapryjemstva adbudziecca ŭ navučalnym korpusie EHU.
Uvaha! 27 kastryčnika ad 11 da 13 hadziny ŭ EHU buduć razyhranyja 5 kvitkoŭ na kancert hurta «Lapis Trubiackoj» dla haściej «Univiersiteckich vakacyj»! Zaprašajem da ŭdziełu! Padrabiaznaja infarmacyja tut.
Adras: haradski rajon Antokal, vulica Valakupių 5. Ad vakzała možna dabracca na tralejbusie №2 (35 chvilin).
Taksama infarmujem vas, što paśla kancerta Lapisaŭ usie žadajučyja, asabliva tyja, kamu nie chapiła miescaŭ u hatelach,
zmohuć naviedać afterparty ŭ kłubie LOFTAS (Švitrigailos g. 29) i pratusić tam da samaj ranicy!
Zrobim apošnija vychodnyja kastryčnika nieaficyjnymi dniami kultury Biełarusi ŭ Litvie!
