Na hetym tydni šyroki rozhałas u vuzkich palityčnych kołach vyklikaŭ artykuł Aleha Bahuckaha, raźmieščany ŭ Internecie i rastyražavany dziaržaŭnaj presaj.
Palityki aburalisia pryjomami, z dapamohaju jakich aŭtar beścić usie siły, što skłali «demakratyčnuju piaciorku». Chto taki Bahucki?
Jon kiraŭnik prapahandysckaj kamisii Narodnaj hramady. Jamu 35 hadoŭ, jon uradženiec Połaččyny. U 1990 hodzie byŭ deputatam połackaha harsavietu, ale što cikava — pad inšym proźviščam! Bahuckim jon staŭ, kali pierajechaŭ u Miensk. Pa adukacyi Bahucki historyk. Kažuć, što ŭ pačatku 90-ch napisaŭ knihu z hańbavańniem Unii, ale jon sam hety fakt admaŭlaje. U druhoj pałovie 90-ch jon užo ŭznačalvaŭ vykankam Biełaruskaj sacyjał-demakratyčnaj hramady. Stanisłaŭ Šuškievič jamu daviaraŭ, ličyŭ Bahuckaha «davoli adukavanym čałaviekam», jaki, adnak, tak i nie navučyŭsia daskanała havaryć pa-biełarusku.
Byłyja partyjnyja paplečniki Bahuckaha zhadvajuć pra jaho jak pra «niezrazumiełaha čałavieka». Padčas prezydenckich vybaraŭ 2001 h. Bahucki pracavaŭ u štabie Sinicyna, jaki vystupaŭ svojeasablivaj karykaturaj na demakratyčnych kandydataŭ. A ŭžo pry kancy 2001-ha z skandałam syšoŭ u partyju Statkieviča, jakoha razhromna krytykavaŭ tryma hadami raniej. Sychodziačy, Bahucki padaŭ u Miniust śpis z trochsot čałaviek, jakija nibyta razam ź im vyjšli z BSDH. Ale padčas pravierki vyjaviłasia, što syšli tolki siem čałaviek. Źviestki na inšych, vierahodna, byli ŭziatyja z partyjnaj kamputarnaj bazy. U śpis «niezadavolenych» patrapiła navat žonka Šuškieviča, jakaja ŭ bazie fihuravała pad inšym proźviščam, čaho nia viedaŭ padatčyk.
Raskazvajuć, što «ŭ jaho šmat złości na ŭsich i ŭsio».
AT
