20 listapada 2003
Zachady Eŭrakamisii suprać Biełarusi
Eŭrakamisija nie pavialičyć biełaruskich kvotaŭ na ekspart tekstylu ŭ Eŭraźviaz. Brusel tłumačyć heta parušeńniami demakratyi i pravoŭ čałavieka ŭ Biełarusi. EZ viadzie kansultacyi ź Mienskam tolki pra padaŭžeńnie staroha pahadnieńnia. Štohod u Eŭraźviaz pradajecca biełaruskich tekstylnych vyrabaŭ na 120 młn dalaraŭ, a ekspartny patencyjał składaje 180 młn. Tekstyl — druhi najbujniejšy artykuł biełaruskaha ekspartu ŭ EZ paśla kalijnych uhnajeńniaŭ.
Miljon mabilnikaŭ
Aperatary sotavaj suviazi deklarujuć, što kolkaść abanentaŭ suviazi pieravysiła miljon. 600 tysiačaŭ abanentaŭ maje «Vełkam», 380 — u «MTS» i z 20 tysiačami ŭ aŭtsajderach zastajecca «Biełsieł». Ahladalniki miarkujuć, što hetyja ličby mohuć być u niekatoraj stupieni zavyšanymi.
Rost inflacyi
U kastryčniku padskočyli tempy inflacyi. Z pačatku hodu ceny ŭźnialisia ŭžo na 20,6%. Dla paraŭnańnia: inflacyja ŭ zonie eŭra za 10 miesiacaŭ skłała 1,6%.
«Fijat Panda» — mašyna hodu
Novy «Fijat Panda» pryznany eŭrapiejskim «Aŭtamabilem-2004», abvieściła žury z 58 žurnalistaŭ bujnych eŭrapiejskich aŭtavydańniaŭ. Druhoje miesca padzialili «Mazda-3» i novy «Falksvahien-Holf-V».
Eŭrapiejskija aŭtavytvorcy pieražyvajuć nia lepšyja časy. Za 10 miesiacaŭ na darohi Eŭropy vyjechała 12 młn 188 tys. novych aŭto, što na 1,3% mienš, čym letaś. Tolki karejskija i japonskija firmy pavialičyli svaje prodažy adpaviedna na 18,9% (da 399 tys. mašyn) i na 8% (da 1,55 młn mašyn).
«SER» za źmieny Padatkovaha kodeksu
Deputackaja hrupa «Spryjańnie ekanamičnamu raźvićciu» prapanuje vyśvietlić, ci adpaviadajuć Kanstytucyi asobnyja pałažeńni Padatkovaha kodeksu. Samy sprečny punkt dakumentu — prymusovaje adčužeńnie majomaści padatkapłatnika pa rašeńni padatkovaha orhanu ŭ vypadku, kali jość zapazyčanaść za padatki. Deputaty miarkujuć, što adčužeńnie nia moža ažyćciaŭlacca ŭ pazasudovym paradku. Kab deputacki zapyt byŭ nakiravany ŭ Kanstytucyjny sud, za jaho musić prahałasavać bolšaść parlamentaroŭ. Šancaŭ na heta niašmat.
Kuplaj svajo
Urad abaviazaŭ handlovyja pradpryjemstvy mieć u ahulnym abjomie tavarazvarotu nia mienš za 70% tavaraŭ ajčynnaj vytvorčaści. Patrabavańnie datyčyć kramaŭ, jakija znachodziacca pad kryłom Minhandlu, Biełkaapsajuzu i vykankamaŭ.
Kampensacyi za zachodniebiełaruskuju majomaść
Pavodle rašeńnia polskaha Sojmu, «zabužanie», h.zn. hramadzianie Polščy, što stracili nieruchomaść u Zachodniaj Biełarusi j Ukrainie paśla druhoj suśvietnaj vajny, majuć prava na kampensacyi ŭ pamiery 15% ad koštu nieruchomaści, ale nia bolš za 50 tys. złotych (13 tys. dalaraŭ). Hetaja kvota budzie im zaličvacca na rachunak kuplenaj u dziaržavy nieruchomaści. Prava na kampensacyi majuć tyja, chto žyŭ na terytoryjach, što naležali da Polščy, na momant 1 vieraśnia 1939 h., maje ciapier polskaje hramadzianstva i pražyvaje ŭ Polščy stała.
MB; BiełaPAN
