Pačałasia doŭhačakanaja rekanstrukcyja Kupałaŭskaha memaryjalnaha zapaviedniku ŭ Laŭkach (Aršanščyna).
Zhodna z encyklapedyjami, u kastryčniku pavinny byli śviatkavacca 25-ja ŭhodki z dnia jaho zasnavańnia (praŭda, u knizie vodhukaŭ pieršy zapis zrobleny naviednikami nie ŭ 1978, a ŭ 1977 h.). Dziakujučy sioletniamu ahramadnamu dobraŭparadkavańniu raźmieščanaha za 2 kilametry miastečka Kopyś — małoj radzimy Łukašenki (hł. «NN», №41) — znajšlisia hrošy i dla kupałaŭskaha memaryjału. Užo zamienienyja dachi niekatorych budynkaŭ, ściežki brukujucca plitkaj, budujecca draŭlanaja leśvica da Dniapra. Ale pažadana, kab znajšlisia srodki dla zamieny maralna i fizyčna sastarełaj ekspazycyi muzeju. Terminova čakaje kvalifikavanaj dapamohi j cudoŭnaja skulptura Janki Kupały aŭtarstva Anatola Anikiejčyka. Choć ź niadaŭniaha času pomnik i aharodžany, niejkaja svałata vyskrabła na śpinie paeta rasiejskaje maciernaje słova.
Viktar Lutynski, Vorša
