Samsung Galaxy S6 i S6 Edge
Napiaredadni vystavy Mobile World Congress u Barsiełonie Samsung na ŭłasnym mierapryjemstvie pradstaviŭ svaje fłahmanskija smartfony 2015 hoda. Dźvie madeli adroźnivajucca tolki bakavinami: Galaxy S6 maje zahnuty na abiedźvie bakaviny ekran.
Novyja smartfony Samsung majuć pierarobleny dyzajn. Ciapier nie tolki piaredni, ale i zadni bok pakryty kalonym škłom Gorilla Glass. Ad płastyku ŭ korpusie karejcy admovilisia praktyčna całkam: tarcy vykananyja ź mietału.
Pa dyzajnie S6 nahadvaje bajstruka iPhone 4 i iPhone 6, ale maje i ŭłasnyja firmovyja rysy.
Galaxy S6 i iPhone 6
Galaxy S6 i Galaxy S5
Siarod «ułasnych» — vyciahnutaja knopka Home pad ekranam albo kvadratnaje «vočka» zadniaj kamiery. Šklanaja zadniaja kryška sustrakałasia jak u iPhone 4, tak i ŭ mnohich smartfonaŭ Sony. Bakaviny «pad šosty ajfon» užo prysutnyja ŭ mnohich «biezymiennych kitajcaŭ».
Ekran S6 Edge zahnuty tak ža, jak i ŭ letašniaha Galaxy Note 4 Edge — tolki ŭ abodva baki.
Zahnuty ekran daje dadatkovuju funkcyjanalnaść: na im pa vybary karystalnika mohuć raźmiaščacca knopki albo dadatkovaja infarmacyja. Naprykład, padčas hulni infarmacyja ab telefanavańni adlustrujecca na bakavinie. Taksama na bakavinu možna vyvieści hadzińnik albo navat liniejku.
Praz «modnyja» karpusy smartfony zhubili try važnyja rysy: ustojlivaść da vady, zdymkuju batareju i słot dla kartak pamiaci.
Knopka Home nie źmianiła dyzajn, ale pa funkcyjanale nabliziłasia da taho ž iPhone 6. Intehravany ŭ jaje skanier adbitkaŭ palcaŭ ciapier pracuje navat kali nie pravieści, a lohka nacisnuć palcam na knopku.
Taŭščynia smartfonaŭ adčuvalna źmienšyłasia — da 6,8 mm, na 0,1 mm tančej za iPhone 6. Vaha — 138 hram.
Z dapamohaj skanieru adbitkaŭ palcaŭ dy technałohij NFC i MST (Magnetic Secure Transmission) ciapier možna ździajśniać biespravadnyja płaciažy praź sistemu Samsung Pay. Karejcy znajšli cikavy sposab abahnać sistemu kankurenta Apple Pay.
Galaxy S6 z bratam praz technałohiju MST umiejuć pracavać «pa pavietry» sa zvyčajnymi terminałami płastykavych kartak z mahnitnaj pałasoj.
Pa śćvierdžańniach Samsung, kala 90% kramaŭ u ZŠA ŭžo hatovyja da technałohii Samsung Pay. Ad karystalnika treba adno — «pryviazać» svaju kartku da smartfona. Pierad płaciažm treba paćvierdzić svaju asobu praz skanier adbitkaŭ palcaŭ. Samsung Pay pačnie pracavać u ZŠA i Paŭdniovaj Karei ŭžo hetym letam.
Fłahmany Samsung atrymali tradycyjna topavaje «žaleza» — adzin z samych mahutnych na siońnia pracesaraŭ, samy detalny ekran, samuju «navaročanuju» kamieru.
Samsung vyrašyła admovicca ad pracesaraŭ Qualcomm (pa čutkach — praź pierahreŭ najnoŭšych Snapdragon) i vypuścić tolki viersii z ułasnymi pracesarami Exynos 7240. Novy 8-jadzierny 64-bitny pracesar Samsung vykanany pa 14 nm-techpracesu. Apieratyŭnaj pamiaci na borcie 3 Hb, unutranaj — 32, 64 albo 128 Hb (nahadajem, słotu dla kartak pamiaci niama).
Dyspłej smartfonaŭ maje dyjahanal 5,1 calaŭ i razroźnieńnie 2k (2560ch1440), što daje najvyšejšuju vyraznaść vyjavy ŭ 577 kropak na calu — asobnyja piksieli niaŭzbrojenym razhladzieć niemahčyma (dy i z łupaj — ciažka).
Asobny honar Samsung — kamiery, jakija na prezientacyi kampanija nie saromiełasia paraŭnoŭvać z kamierami iPhone.
Zadniaja kamiera maje razroźnieńnie 16 miehapiksielaŭ, paskorany aŭtafokus, dvajnuju ŭspyšku. Jana zapuskajecca za rekordnyja 0,7 siekundy, vyklikać jaje možna dvajnym naciskańniem na knopku Home. Frantalnaja kamiera maje razroźnieńnie 5 Mp.
Smartfony pracujuć na Android 5.0 Lollypop. Firmovych dadatkaŭ Samsung pamienała, ale źjavilisia ad Microsoft.
Ad Samsung zastaŭsia «ablehčany» firmovy interfiejs TouchWiz dy prahramy Samsung Pay I Samsung Health. Ad Microsoft — vobłačnaje schovišča OneDrive (dajecca 115 Hb na dva hady), OneNote i Skype.
Smartfony majuć mienšy za papiarednikaŭ akumulatar, 2550 i 2600 mAh u S6 i S6 Edge adpaviedna.
Skampiensavać nie samyja vialikija akumulatary pry mahutnym «žalezie» musiać intehravanaja biespravadnaja zaradka i mahčymaść zvyšchutkaj zaradki pa kabieli (kažuć ab 4 hadzinach pracy za 10 chvilin zaradki).
Smartfony buduć pradavacca ŭ biełym, čornym i załacistym. S6 taksama budzie mieć sini varyjant korpusu, S6 Edge — zialony.
Da smartfonaŭ budzie vypuščanaja admysłovaja viersija šlema Galaxy VR. Dastatkova ŭstavić u jaho smartfon — atrymajecca šlem virtualnaj realnaści, vyjava ź jakoha budzie ŭsprymacca trochvymiarovaj.
Aparaty źjaviacca ŭ prodažy na 20 bujnych rynkach 10 krasavika. Cana aficyjna nie nazvanaja.
Pa čutkach, Galaxy S6 ź minimalnym abjomam pamiaci budzie kaštavać u rajonie 850 dalaraŭ, S6 Edge — na 50-100 dalaraŭ daražej. Ceny na 128 Hb-viersii buduć vyšej za tysiaču dalaraŭ.
