Da zboru podpisaŭ prystupili 7 z 8 pretendentaŭ na prezidenckuju pasadu. Maŭčańnie zachoŭvaje tolki inicyjatyŭnaja hrupa Žanny Ramanoŭskaj.
Pra hetuju kandydatku dahetul ničoha nieviadoma. Na žal, pieršaje «intervju» Ramanoŭskaj, jakoje jana dała «NN», tak i stała apošnim. Parazmaŭlać z žančynaj nie zmoh bolš ni adzin žurnalist.
U pieršyja dni paśla rehistracyi jana jašče adkazvała ŭ «Adnakłaśnikach». Praŭda, pa-raniejšamu prykryvajučysia nieadkładnaj pracaj, pieranosiła razmovu z dnia na dzień. Ciapier mabilny telefon Ramanoŭskaj adklučany, na paviedamleńni jana nie adkazvaje zusim.
«Naša Niva» sprabuje razabracca, kaho i dla čaho pradstaŭlaje pretendentka.
Kiraŭnik inicyjatyŭnaj hrupy paciarpieŭ za majku sa Statkievičam
Pavodle infarmacyi Centrvybarkama, inicyjatyŭnuju hrupu Ramanoŭskaj uznačalvaje Jaŭhien Naporka. Čym viadomy jaje hałoŭny pamočnik?
U vieraśni 2013 hoda staličny aktyvist i troje jahonych siabroŭ apranuli na lehkaatletyčny «Kubak vykliku» majki z nadpisam «Sierabranka – za sport, Biełaruś i Statkieviča».
Usie čaćviora byli zatrymanyja. Naporku daviałosia pravieści dva dni ŭ izalatary. Sudździa Natalla Vajciachovič aštrafavała jaho na 20 bazavych vieličyniaŭ za «parušeńnie paradku praviadzieńnia masavych mierapryjemstvaŭ».
Naporka zavočna skončyŭ Instytut fizkultury (pa śpiecyjalnaści «futboł») i Instytut pavyšeńnia kvalifikacyi i pierapadrychtoŭki BNTU (śpiecyjalnaść «ekanomika»).
Pavodle infarmacyi ŭ sacyjalnych sietkach, jon pracuje načalnikam kałony ŭ staličnym aŭtobusnym parku №4.
Hrupa padtrymki – siemji z Brestčyny
U inicyjatyŭnaj hrupie Ramanoŭskaj naličvajecca 107 čałaviek. Hety najmienš siarod usich jaje apanientaŭ. Adnak dakumienty byli składzienyja adkazna, tamu paśpiachova prajšli pravierku ŭ CVK.
Astatnija maleńkija inicyjatyŭnyja hrupy nie padychodzili pa farmalnych prykmietach – u kahości nie chapiła čałaviek, niechta nie žyŭ na terytoryi Biełarusi patrebny čas.
Inicyjatyŭnaja hrupa pretendentaŭ praduhledžvaje najaŭnaść rehijanalnych kaardynataraŭ. U Ramanoŭskaj takija ludzi jość na Brestčynie i ŭ Minsku. Chto hetyja ludzi? Jość niekalki IP-šnikaŭ, kancertmiejstar, rabotnik aŭtaparka… U astatnich abłaściach kaardynatarami pretendentki zapisanaja… sama Žanna Ramanoŭskaja.
Što da šerahovych aktyvistaŭ, to ŭ vočy kidajecca vialikaja kolkaść adnolkavych proźviščaŭ. Naprykład, Aleksiejukoŭ – ažno 11 čałaviek (heta bolš za 10% hrupy!). Imavierna, u śpisie akazalisia ŭsie svajaki kandydatki, bo Aleksiejuk – jaje dziavočaje proźvišča. Ź inšaj siamji, Majakovych, uziali jašče 6 čałaviek.
Tam, dzie adnolkavaje proźvišča majuć troje «aktyvistaŭ» Ramanoŭskaj, najčaściej heta baćki i dzicia.
Najbolšaja kolkaść ludziej žyvuć u Breście, Kamiancy i Minsku.
Zbor podpisaŭ nie viadziecca
Nivodnaha pikieta ŭ padtrymku Ramanoŭskaj pakul nie było vidać. «Nakolki ja viedaju, zbor podpisaŭ viadziecca», – zapeŭnivaje Jaŭhien Naporka. Jon padtrymlivaje suviaź z kandydatkaj tolki praź internet.
Adnak sami siabry inicyjatyŭnaj hrupy kažuć, što podpisy nie źbirajuć.
Mała chto z apytanych «aktyvistaŭ» uvohule razumieje, što adbyvajecca. «Ja ŭžo daŭ podpis za Ramanoŭskuju», – kaža małady čałaviek ź inicyjatyŭnaj hrupy.
Ci viedaje jon, ci moža padpisacca? Nie. I hety pry tym, što jahonyja baćki farmalna źjaŭlajucca kaardynatarami Ramanoŭskaj.
«Heta prosta praz znajomych paprasili zapisacca ŭ niejkuju hrupu», – tłumačyć inšy ŭdzielnik vybarčaha farsa.
Pakul usia aktyŭnaść Ramanoŭskaj źviazałasia da adkryćcia rachunka dla achviaravańniaŭ na jaje vybarčy fond.
Ci źviazana z «Havary praŭdu»?
Adrazu niekalki ŭdzielnikaŭ biełaruskaha palityčnaha pracesu namiakajuć na suviazi kandydatki z «Havary praŭdu». Maŭlaŭ, Ramanoŭskaja pavinna efiektna źniacca na karyść Taćciany Karatkievič.
«Jana prychodziła niedzie z paŭhoda-hod tamu, kazała, što źbirajecca pajści ŭ prezidenty. Ale na hetym usio i skončyłasia», – raskazvaje Andrej Dźmitryjeŭ, staršynia «Havary praŭdu» i kiraŭnik inicyjatyŭnaj hrupy Karatkievič.
Ci padtrymlivaje Dźmitryjeŭ kantakty sa štabam Ramanoŭskaj? Palityk zapeŭnivaje, što nijakich.
Adnak prynamsi ŭ sacyjalnych sietkach suviaź była vidać.
«Ramanoŭskaja Žanna zarehistravanaja ź inicyjatyŭnaj hrupaj u kolkaści 110 čałaviek. Jana ŭpeŭnienaja ŭ zbory 100 000 podpisaŭ. Jaŭhien Naporka (imia było zatehiravana), a ty mnie pra jakuju kolkaść kazaŭ?» – napisaŭ Dźmitryjeŭ u «Fejsbuku» niepasredna z pasiedžańnia Centrvybarkama.
«Na, atrymlivaj, Žeka, hranatu na svaju hałavu!» – pažartavali ŭ kamientarach. «Byvaje…» – niapeŭna prakamientavaŭ sam Naporka.
Na suviazi praz «Adnakłaśniki»
Adziny sposab kamunikacyi Ramanoŭskaj z patencyjnymi vybarščykami – staronka ŭ «Adnakłaśnikach».
«Pośpiechaŭ na vybarach», – rassypaje smajliki-kvietki dziaŭčyna ź Minska. «Dziakuju Vam», – adkazvaje kandydatka, dadajučy smajliki z sardečkam i z uśmieškaj.
Heta jaje druhaja fraza za ŭsie dni abmierkavańniaŭ. Raniej Ramanoŭskaja paśpieła napisać, što budzie asabista źbirać podpisy ŭ Babrujsku.
Astatni čas na staroncy prapanujuć zdać Japonii ŭ arendu Bresckuju vobłaść i vyśviatlajuć adnosiny praz pamyłkovaje napisańnie słova «po siejeł» adnym z udzielnikaŭ dyskusii.
