Першы віцэ-прэзідэнт Нацыянальнага алімпійскага камітэта Максім Рыжанкоў надзелены паўнамоцтвамі памочніка прэзідэнта па пытаннях фізічнай культуры, спорту і развіцця турызму.
Адпаведны ўказ (№ 656) Аляксандр Лукашэнка падпісаў 31 снежня. Дакумент апублікаваны 7 студзеня на Нацыянальным прававым інтэрнэт-партале.
Рыжанкову даручана «весці пытанні фарміравання і правядзення дзяржаўнай палітыкі ў галіне фізічнай культуры, спорту і турызму, далейшага развіцця алімпійскага руху ў Рэспубліцы Беларусь».
Віцэ-прэзідэнта НАК таксама абавязалі: аналізаваць працу дзяржаўных органаў і іншых дзяржаўных арганізацый у галіне фізічнай культуры, спорту і турызму, уносіць прапановы па яе ўдасканаленні; забяспечваць узаемадзеянне кіраўніка дзяржавы з рэспубліканскімі і міжнароднымі спартыўнымі арганізацыямі (федэрацыямі, саюзамі, асацыяцыямі); уносіць прапановы па планаванні і правядзенні спартыўна-масавых і спартыўных мерапрыемстваў з удзелам прэзідэнта Беларусь і адказваць за іх падрыхтоўку.
Чыноўнік НАК, які атрымаў паўнамоцтвы памочніка кіраўніка дзяржавы, паводле ўказа, «можа надзяляцца іншымі паўнамоцтвамі ў адпаведнасці з рашэннямі прэзідэнта Рэспублікі Беларусь».
Фінансаванне расходаў, звязаных з ажыццяўленнем Рыжанковым прадугледжаных указам паўнамоцтваў, ажыццяўляецца за кошт сродкаў НАК.
Указ набыў моц 1 студзеня 2015 года.
