У кулуарах паседжання Палаты прадстаўнікоў журналіст «Нашай Нівы» пагутарыў з былым старшынёй Белтэлерадыёкампаніі Генадзем Давыдзькам, якому далі пад кіраванне «Белую Русь».
«Наша Ніва»: Як ацэньваеце БТ пры новым кіраўніку, Іване Эйсманце?
Генадзь Давыдзька: Няма чаго адказаць. Справа ў тым, што калі я працаваў, то павінен быў глядзець тэлебачанне штодзень. А цяпер я толькі навіны гляджу, іншыя праекты — не, бо шмат сваёй работы.
«НН»: А чым цяпер займаецеся?
ГД: У асноўным нашым сайтам [»Белай Русі»] займаемся, спрабуем зрабіць яго дасціпным і сучасным, каб гэта быў не толькі сродак камунікацыі, але і інфармацыйнага ўздзеяння, нават прапагандысцкага.
«НН»: Гэта будзе СМІ?
ГД: Не, не СМІ. Нельга не выкарыстоўваць тых амаль 180 тысяч нашых сяброў, якія ёсць у кожным населеным пункце — яны будуць фрылансерамі.
«НН»: Нашыя чытачы памятаюць вашае сэлфі для тэлеграма. Што вы, як актыўны карыстальнік гэтага мэсэнджара, думаеце пра яго забарону ў Расіі?
ГД: Я супраць любых забарон. Нельга забараняць тэлеграм. І Хартыю нельга!
Я карыстаюся тэлеграмам, але толькі па асабістых сувязях: з сябрамі, жонкай, дачкой. А з чыноўнікамі па мэйле кантакт трымаем ці звонім.
«НН»: Калі чакаць вяртання ў эфір «Клуба рэдактараў»?
ГД: «Клуб рэдактараў» адновім у жніўні, трохі зменім фармат — будзем запрашаць палітычных экспертаў, а таксама недзяржаўную прэсу.