Пяскоў не стаў каментаваць словы Лукашэнкі пра «вагнераўцаў» і Прыгожына
Прэс-сакратар прэзідэнта Расіі Дзмітрый Пяскоў не стаў каментаваць ацэнкі Аляксандра Лукашэнкі ў дачыненні да прычын узброенага бунту ў Расіі, нагадаўшы, што расійскі лідар Уладзімір Пуцін даў высокую ацэнку намаганням Лукашэнкі па ўрэгуляванні, як піша ТАСС.
Дзмітрый Пяскоў. Фота: kremlin.ru
Раней Лукашэнка заявіў, што ў сувязі з апошнімі падзеямі ў Расіі «ні ў якім разе» не трэба рабіць героя з яго, з Пуціна ці заснавальніка ПВК «Вагнер» Яўгена Прыгожына, бо «сітуацыю выпусцілі», а потым «думалі, што разыдзецца, а яно не разышлося».
«Не думаю, што маю права каментаваць Аляксандра Рыгоравіча. Прэзідэнт [РФ Уладзімір Пуцін] наўпрост учора даў высокую ацэнку яго намаганням па ўрэгуляванні гэтага крызісу, — сказаў Пяскоў у аўторак журналістам. — Ну і, вядома, тут усё ж галоўнае — гэта намаганні прэзідэнта Расійскай Федэрацыі, яго воля не дапусціць горшага развіцця падзей. Гэта было зроблена».
Адказваючы на пытанне, ці ёсць у Крамля пацвярджэнне інфармацыі, якая з'явілася ў медыя, аб тым, што Прыгожын ужо нібыта прыбыў у Беларусь, Пяскоў адзначыў: «Тут я не маю ніякіх звестак і нічога не магу вам сказаць».
Чытайце таксама:
Лукашэнка заявіў, што ў суботу прывёў войскі ў поўную боегатоўнасць
