Эксперты ў ЗША рэкамендавалі вакцыну BioNTech/Pfizer для дзяцей ва ўзросце 5—11 гадоў
Група незалежных экспертаў у аўторак рэкамендавала Упраўленню па санітарным наглядзе за якасцю харчовых прадуктаў і медыкаментаў ЗША (FDA) дазволіць выкарыстанне вакцыны BioNTech/Pfizer сярод дзяцей ва ўзросце ад 5 да 11 гадоў.
Рашэнне было прынята пераважнай большасцю галасоў, піша Deutsche Welle.
Члены экспертнай камісіі сышліся ў меркаванні, што перавагі вакцынацыі пераважваюць звязаныя з ёй рызыкі.
FDA не абавязана прытрымлівацца рэкамендацый знешніх экспертаў, але звычайна прыслухоўваецца да іх. Рэгулятар прыме ўласнае рашэнне аб вакцынацыі дзяцей на працягу наступных некалькіх дзён. Калі будзе вырашана ўхваліць вакцыну, то ў пачатку лістапада гэтае пытанне разгледзяць цэнтры па кантролі і прафілактыцы захворванняў.
Прадстаўнікі кампаній Pfizer і Biotech заявілі, што эфектыўнасць іх вакцыны ў прадухіленні выпадкаў заражэння каранавірусам сярод дзяцей ва ўзросце ад 5 да 11 гадоў перавышае 90%.
