У ЗША мяркуюць, што Расія не мае дастаткова сілаў для кантролю акупаванай Херсоншчыны
Амерыканскія афіцыйныя асобы схіляюцца да меркавання, што Расія не мае дастатковай колькасці сілаў, каб цалкам кантраляваць акупаваную яе войскамі тэрыторыю Херсонскай вобласці. Пра гэта паведамляе амерыканскі тэлеканал CNN са спасылкай на крыніцы.
Херсон з вышыні птушынага палёту. 20 мая 2022 года
Афіцыйныя асобы ЗША звяртаюць увагу на шэраг інцыдэнтаў апошніх тыдняў, звязаных з замахамі на жыццё калабарантаў. Амерыканская выведка называе гэта доказам «росту партызанскай дзейнасці на поўдні Украіны».
На думку апытаных CNN чыноўнікаў, адцягванне часткі расійскіх войскаў з херсонскага на данбаскі кірунак стварыла для партызанаў акно магчымасцяў для нападаў на калабарантаў, а для ўкраінскіх сілаў — час для контрнаступлення.
У ЗША падкрэсліваюць, што рух супраціву на акупаванай Херсоншчыне пакуль не перарос у арганізаваны і скептычна ставяцца да яго перспектыў. Але ў доўгатэрміновай перспектыве ён можа прывесці да масавых паўстанняў сярод украінскага насельніцтва.
Адной з прычын няўдач расійскіх вайскоўцаў амерыканскія чыноўнікі называюць прыярытэт ваеннай кампаніі перад наладжваннем цывільнага жыцця на акупаваных тэрыторыях.
