U ZŠA miarkujuć, što Rasija nie maje dastatkova siłaŭ dla kantrolu akupavanaj Chiersonščyny
Amierykanskija aficyjnyja asoby schilajucca da mierkavańnia, što Rasija nie maje dastatkovaj kolkaści siłaŭ, kab całkam kantralavać akupavanuju jaje vojskami terytoryju Chiersonskaj vobłaści. Pra heta paviedamlaje amierykanski telekanał CNN sa spasyłkaj na krynicy.
Chierson z vyšyni ptušynaha palotu. 20 maja 2022 hoda
Aficyjnyja asoby ZŠA źviartajuć uvahu na šerah incydentaŭ apošnich tydniaŭ, źviazanych z zamachami na žyćcio kałabarantaŭ. Amierykanskaja vyviedka nazyvaje heta dokazam «rostu partyzanskaj dziejnaści na poŭdni Ukrainy».
Na dumku apytanych CNN čynoŭnikaŭ, adciahvańnie častki rasijskich vojskaŭ z chiersonskaha na danbaski kirunak stvaryła dla partyzanaŭ akno mahčymaściaŭ dla napadaŭ na kałabarantaŭ, a dla ŭkrainskich siłaŭ — čas dla kontrnastupleńnia.
U ZŠA padkreślivajuć, što ruch supracivu na akupavanaj Chiersonščynie pakul nie pieraros u arhanizavany i skieptyčna staviacca da jaho pierśpiektyŭ. Ale ŭ doŭhaterminovaj pierśpiektyvie jon moža pryvieści da masavych paŭstańniaŭ siarod ukrainskaha nasielnictva.
Adnoj z pryčyn niaŭdač rasijskich vajskoŭcaŭ amierykanskija čynoŭniki nazyvajuć pryjarytet vajennaj kampanii pierad naładžvańniem cyvilnaha žyćcia na akupavanych terytoryjach.