Režysior-samarodak ź Bieraścia źniaŭ cudoŭny film-prypavieść za 500 dalaraŭ VIDEA
Bieraściejec Haryk Viepškoŭski źniaŭ karotkamietražnaje kino za siaredniestatystyčnuju zarpłatu biełarusa — 500 dalaraŭ.
Drama «Padarunak» — vyklik tym, chto ličyć, što pośpiech kino praparcyjny jaho biudžetu.
U stužcy źnialisia prafiesijnyja akciory, viadomyja hledaču svajoj pracaj u teatralnych pastanoŭkach i vialikim kino. Ich praca ŭ «padarunak» akazałasia dla režysiora padarunkam — akciory pracavali vyklučna za ideju. Muzyku da filma kampazitar taksama napisaŭ absalutna zadarma. Praca hukarežysiora i hrymiora taksama nie zapatrabavała finansavych vydatkaŭ — Haryku ŭdałosia sabrać kamandu entuzijastaŭ.
U asnovie filma lažyć prypavieść, aŭtarstva jakoj ustanavić nie ŭdałosia. Scenar napisaŭ sam Viepškoŭski, u jakaści apieratara vystupiŭ jon ža (Haryk zajmajecca videazdymkaj), mantavaŭ film taksama sam.
500 dalaraŭ, vydatkavanyja na zdymki, pajšli na arendu śviatła, huku i jašče niekatoraha zdymačnaha abstalavańnia. «Pakolki ja zajmajusia videazdymkaj, nievialikaja amatarskaja kamiera ŭ mianie jość. U mianie byli peŭnyja patrabavańni da malunka, tamu i braŭ naprakat sioje-toje abstalavańnie», — raskazvaje jon.
«Padarunak» — heta historyja zvyčajnaj siamji, jakich šmat. U siamji hierojaŭ niekalki hadoŭ tamu zahinuła mama, i na vychavańni baćki zastałosia dvoje padletkaŭ: syn i dačka. Kožny svoj dzień naradžeńnia syn pytaŭsia ŭ taty, što toj jamu padoryć na 18-hodździe. Baćka kožny raz adkazvaŭ žartam: «Davaj dažyviom da 18-ci, potym pahavorym»…
Zrešty, nie budziem pierakazvać siužet, pahladzicie film sami, nie paškadujecie.
Heta ščymlivaja historyja pra sapraŭdnaha Tatu.
