Ci dastatkova mienš jeści, kab pachudzieć? Usio nie tak prosta
My taŭściejem, kali atrymlivajem ź ježaj bolš kałoryj, čym tracim, i chudziejem, kali tracim bolš, čym atrymlivajem. Tady, zdajecca, kluč dla pachudzieńnia — mała jeści. Ale čamu heta nie zaŭsiody dapamahaje?
Fota: pixabay.com
Kali vy tracicie bolš kałoryj, čym atrymlivajecie, u vas nazirajecca deficyt kałoryj. U vypadku, kali jon zanadta vialiki, heta moža parušyć mietabaličnyja pracesy ŭ arhaniźmie, a taksama vyklikać tak zvany efiekt jo-jo.
Tak nazyvajuć situacyju, kali stračanaja padčas pachudzieńnia vaha chutka viartajecca, i zamiest stabilnaj vahi cieła čałaviek atrymlivaje svojeasablivyja areli. Heta padobna da dziciačaj cacki jo-jo, šaryk u jakoj taksama ruchajecca ŭvierch i ŭniz. Niaredka paśla takoha čałaviek znoŭ sadzicca na strohuju dyjetu i znoŭ chutka stračvaje vahu, ale paśla zakančeńnia dyjety hetaja ž vaha znoŭ viartajecca nazad. Usia sprava ŭ tym, što strohija dyjety zapavolvajuć mietabalizm, i ŭ vyniku arhanizm pačynaje mienš aktyŭna spalvać kałoryi.
Źnižeńnie kałaryjnaści racyjonu sapraŭdy dapamahaje pachudzieć, ale ž svaju normu kałoryj treba padbirać indyvidualna. Pry hetym uličvajuć uzrost čałavieka, jaho vahu, rost, poł i navat uzrovień fizičnaj aktyŭnaści.
Jość jašče adzin faktar: kali vy spažyvajecie mienš ježy, heta nie abaviazkova aznačaje, što vy atrymlivajecie mienš kałoryj. Čałaviek nabiraje vahu nie ad hramaŭ ci kiłahramaŭ ježy, a ad kałoryj, jakija ŭ joj źmiaščajucca. Naprykład, u 10 hramach aleju až 90 kałoryj, a cełaja hałoŭka sałaty — usiaho 60 kałoryj.
Takim čynam, možna spažyvać małyja abjomy ježy, ale pry hetym zusim nie mieć niedachopu ŭ kałoryjach. Tamu, kali vy vyrašycie źmienšyć svoj racyjon za košt sadaviny i harodniny, ale pry hetym pakiniecie ŭ im bolš kałaryjnuju ježu, vy nie tolki nie schudniejecie, ale i možacie atrymać niedachop karysnych rečyvaŭ u arhaniźmie.
Dyk jak ža pravilna źmianšać svoj racyjon? Pierš za ŭsio, pamianšeńnie pamieru porcyj nie pavinna zakranać sadavinu i harodninu, padčas pachudzieńnia naadvarot treba ŭžyvać ich jak maha bolš. Taksama časam možna nie kranać pamier porcyj, a prosta zamianić pradukt na mienš kałaryjny. Naprykład, vaźmicie niatłusty tvaroh ci zamianicie śvininu na kurycu. Časam možna nie źmianiać i kałaryjnaść praduktu, a prosta zamianić jaho na bolš karysny. Pasprabujcie pradukty z klatčatkaj — jany źmiaščajuć šmat charčovych vałoknaŭ, jakija nadajuć pačućcio sytaści, i paśla ich vy źjadzicie mienš inšaj ježy.
Dyjeta — heta tolki adzin z kampanientaŭ pachudzieńnia. Nie mienš važnaja i fizičnaja aktyŭnaść, jakaja prymušaje nas tracić bolš enierhii i naroščvać kolkaść muskulnaj tkanki ŭ arhaniźmie, jakaja taksama spryjaje pravilnamu mietabalizmu. Kab pravilna chudzieć, taksama važna pić šmat vady i dobra vysypacca. Biez uliku hetych faktaraŭ dyjeta pryniasie adno rasčaravańnie.
Ci sapraŭdy čałaviek pavinien jeści try razy na dzień?
Jak treba charčavacca, kab pravilna stareć
