Rabočy «Naftana» atrymaŭ mocnyja apioki. Kažuć, u zdareńni zamiašany načalnik, jaki cisnuŭ na čalcoŭ niezaležnaha prafsajuza
Rabotnika dastavili ŭ Viciebskuju abłasnuju balnicu.
Fota: «Naftan»
Heta było jašče 31 maja, paviedamlaje «Rabočy ruch». Rabočy «Naftana» Alaksandr Ł. atrymaŭ apioki hałavy i vierchniaj častki cieła na pracoŭnym miescy. Kali jon sprabavaŭ źniać zahłušku ź linii vadarodaŭtrymlivajučaha hazu, adbyŭsia vykid vadarodu, jaki samazahareŭsia.
Zdareńnie adbyłosia praź nievykanańnie techniki biaśpieki. Pa infarmacyi «Rabočaha ruchu», kiraŭnik ustanoŭki addaŭ vusny zahad «pa-chutkamu» zrabić niebiaśpiečnuju pracu.
Zahad byŭ spuščany ŭniz staršamu apierataru ŭstanoŭki, jaki pabajaŭsia piarečyć načalniku. A rabočamu, jaki pajšoŭ vykonvać pracu, nie byŭ aformleny dopusk da hazaniebiaśpiečnaj pracy, i jon pajšoŭ adzin, što zabaroniena, kažuć kalehi.
Paśla kiraŭnik ustanoŭki kazaŭ, što takoha zahadu nie addavaŭ, a vinavaty va ŭsim staršy apieratar ustanoŭki. Apošniaha vysłali ŭ adpačynak za svoj košt i pačali raźbiralnictva.
«Vykanańnie pracedur zhodna z technikaj biaśpieki zajmaje šmat času — składańnie narada-dopusku, padrychtoŭčyja mierapryjemstvy, zbor podpisaŭ adkaznych asob… Tamu techniku biaśpieki prosta praihnaravali.
Pa jakoj pryčynie Alaksandr Ł. pajšoŭ adzin, dakładna nieviadoma — pa infarmacyi ad kaleh, astatnija rabotniki byli zaniatyja inšymi pracami i prosta adbiŭsia niedachop piersanału, bo z zavoda idzie pastajanny adtok daśviedčanych rabotnikaŭ», — padzialilisia z «Našaj Nivaj» pradstaŭniki «Rabočaha ruchu».
Raniej kiraŭnik ustanoŭki, pa ich słovach, pahražaŭ zvalnieńniami svaim rabotnikam, jakija ŭstupili ŭ niezaležny prafsajuz.
«Vioŭ ź imi razmovy, cisnuŭ tym, što nie padoŭžać kantrakty. Niekatoryja pad ciskam sami zvolnilisia, kahości zvolnili, chtości syšoŭ u stačku. A častka ŭ vyniku vyjšła ź niezaležnaha prafsajuza.
Chutčej za ŭsio vinavatym zrobiać staršaha apieratara i apieratara, jaki paciarpieŭ», — razvažajuć surazmoŭcy.
Administracyja «Naftana» nijak nie kamientavała zdareńnie na zavodzie.
Čytajcie jašče:
Skončyŭ žyćcio samahubstvam Uładzimir Krysionak, jaki ŭdzielničaŭ u zabastoŭcy na «Naftanie». Za tydzień da hetaha jaho zatrymlivali siłaviki
Žančyna, jakaja zahnała ŭ kut Cierciela. Chto takaja mieniedžar «Naftana», jakuju treci miesiac mučać sutkami
