«Jak hrom siarod jasnaha nieba». Palitviaźnia-rasijanina Jahora Dudnikava pieravodziać z kałonii ŭ turmu
Siońnia, 15 červienia, sud Babrujskaha rajona i Babrujska ŭzmacniŭ režym źniavoleńnia 21-hadovamu palitźniavolenamu rasijaninu Jahoru Dudnikavu, jakoha asudzili pa šerahu «pratesnych» artykułaŭ da 11 hadoŭ kałonii va ŭmovach uzmocnienaha režymu. Sudździa Pavieł Karcinin pastanaviŭ źmianić Jahoru režym z uzmocnienaha na turemny na try hady. U babrujskaj kałonii palitviazień prabyŭ tolki try miesiacy, u traŭni jaho źmiaścili ŭ pamiaškańnie kamiernaha typu. U chutkim časie palitviaźnia pieraviaduć u adnu z turmaŭ Biełarusi, paviedamlaje «Viasna».
Jak raspaviała maci Jahora, u babrujskaj kałonii jaho prymušali pisać tłumačalnyja zapiski, čamu jon nibyta nie prybirajecca, nie vyciraje pył i h.d. A Jahor, kab nie iści na kanflikt, pisaŭ heta. U mai Dudnikava źmiaścili ŭ pamiaškańnie kamiernaha typu. Maci skazali, što tam jon budzie znachodzicca da lipienia i jaho viernuć u atrad. Ale suprać palitviaźnia nakiravali materyjały ŭ sud.
«Mnie skazali, što byli niaznačnyja parušeńni. Ja i nie pieražyvała, čakała. I voś, jak hrom siarod jasnaha nieba, hety sud. Sama ŭ šoku ad hetaha.
Jahor byŭ nastrojeny vielmi aptymistyčna, vielmi chacieŭ zapisacca ŭ hurtki. Jany jamu admovili va ŭsim. Jamu i tak dali niemały termin, ale i hetaha im akazałasia mała», — raspaviadaje maci Jahora.
Jahora Dudnikava zatrymali 4 maja 2021 hoda ŭ Minsku i źmiaścili ŭ SIZA KDB. Pry zatrymańni jon byŭ źbity, jaho katavali.
«Mianie zatrymali 4 traŭnia 2021 hoda žorstka. Paśpieć uciačy nie było sił. Ich było šmat — ja adzin. Ja adrazu zrazumieŭ što da čaho: pracavaŭ HUBAZ, nie škadujučy ruk, — bili nahami i rukami pry zatrymańni. Kryčali: «Mr***, dabiehaŭsia?» U mianie ŭsio ŭ vačach paciamnieła… Byli i supracoŭniki KDB. Jany pavodzili siabie intelihientna ŭ adroźnieńnie ad HUBAZa — razmaŭlali i zdymali na videa. Jany skazali, što ja — Złojbet (heta akaŭnt u telehram-kanale «AHSB»). Nastupstvami zatrymańnia stali siniaki i raskołaty zub. Mnie skazali, što ja zaklikaŭ ludziej da hvałtu ŭ dačynieńni da supracoŭnikaŭ pravaachoŭnych orhanaŭ. Taksama toje, što ja ahučvaŭ videaroliki, jakija ŭ nastupnym raźmiaščalisia na jutub-kanale Botohsb/partyzanskibot», — raspaviadaŭ Jahor praz advakata.
Chłopcu vystavili abvinavačvańnie pa č. 1 art. 342 Kryminalnaha kodeksa (arhanizacyja dziejańniaŭ, jakija hruba parušajuć hramadski paradak). Potym jamu taksama vystavili abvinavačvańnie pavodle č. 3 art. 130 (raspalvańnie varožaści) i č. 3 art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi) Kryminalnaha kodeksa. Advakata Jahora Antona Hašynskaha pazbavili licenzii ŭ Biełarusi.
20 śniežnia 2021 Minski haradski sud raspačaŭ razhlad spravy ŭ zakrytym režymie. 27 śniežnia abviaścili prysud Jahoru: 11 hadoŭ źniavoleńnia ŭ kałonii ŭzmocnienaha režymu. Takoje pakarańnie vynies sudździa Siarhiej Chrypač pa prapanovie prakurorki Žanny Baranavaj. 25 lutaha 2022 sudździa Viarchoŭnaha suda Ihar Lubavicki razhledzieŭ apielacyjnuju skarhu Jahora i pakinuŭ prysud u sile.
U siaredzinie sakavika Jahor Dudnikaŭ byŭ etapavany ŭ babrujskuju kałoniju № 2.
