U Minsku pjany mužčyna pierabłytaŭ dziciačyja sadki i zabraŭ čužoha chłopčyka
Mužčynu daručyli zabrać plamieńnika ź dziciačaha sadka, ale toj pierabłytaŭ daškolnyja ŭstanovy i pryvioŭ da maci čužoha chłopčyka, paviedamlajuć «Minsk-naviny».
Juryj Hrynievič. Fota «Minsk-naviny»
Hetaja historyja adbyłasia ŭ Leninskim rajonie. Pakul muž byŭ u kamandziroŭcy, žančyna raśpivała śpirtnyja napoi razam sa stryječnym bratam i jaho tavaryšam. U dziciačy sad pa syna jana pajści nie advažyłasia, bo ŭ kancy maja hetaha hoda z-za jaje prychilnaści da ałkaholu pryznali, što chłopčyk znachodzicca ŭ sacyjalna niebiaśpiečnym stanoviščy. Minčanka ničoha lepš nie prydumała, jak delehavać u dziciačy sad svajho brata.
Niećviarozy mužčyna admović svajačcy nie zmoh i adpraviŭsia zabirać plamieńnika. Usio b ničoha, tolki jon pierabłytaŭ daškolnyja ŭstanovy i zabraŭ čužoje dzicia.
Vychavalnica ŭ toj hrupie była na zamienie, tamu nie viedała baćkoŭ dziaciej, a šaścihadovamu chłopčyku dziadźka-samazvaniec paviedamiŭ, što pryjšoŭ pa jaho pa prośbie baćkoŭ. Toj pavieryŭ i bieź lišnich słoŭ adpraviŭsia ź nieznajomcam nibyta dadomu.
U hety čas pa chłopčyka pryjšli jaho sapraŭdnyja baćki i daviedalisia, što syna zabraŭ z sada niejki mužčyna. Jany tut ža patelefanavali na liniju «102». U dziciačy sad nieadkładna vyjechała śledča-apieratyŭnaja hrupa.
Da miesca zdareńnia adrazu prybyŭ i namieśnik načalnika Leninskaha (h. Minska) RASK Juryj Hrynievič. Pa darozie, za dva kvartały ad dziciačaha sadka, jon źviarnuŭ uvahu na dvuch mužčyn, pobač ź jakimi stajaŭ chłopčyk daškolnaha ŭzrostu.
— Ja padyšoŭ da ich i pacikaviŭsia: «Čyjo dzicia?», — raspaviadaje Ju. Hrynievič. — Niećviarozyja hramadzianie adkazali, što chłopčyk zhubiŭsia. Ja zabraŭ jaho i nakiravaŭsia ź im u dziciačy sad. Na ščaście, mały navat nie paśpieŭ spałochacca.
Baćki byli vielmi ŭdziačnyja kiraŭniku za toje, što jon apieratyŭna znajšoŭ dzicia i viarnuŭ jaho. Ju. Hrynievič parekamiendavaŭ im pahavaryć z synam pra toje, što ni pry jakich abstavinach nielha nikudy sychodzić ź nieznajomcami. Aficer taksama adznačyŭ, što raniej padobnyja historyi ŭ Leninskim rajonie nie zdaralisia.
Chłopčyka pieradali baćku — da taho času jon paśpieŭ viarnucca z kamandziroŭki. U supracoŭnikaŭ inśpiekcyi pa spravach niepaŭnaletnich Leninskaha RUUS hetaja siamja ciapier budzie znachodzicca pad asablivym kantrolem.
