«Spynić płaciažy ź Biełarusi ŭ luboj valucie». Vialikija jeŭrapiejskija banki spyniajuć pracu navat ź niepadsankcyjnymi biełaruskimi klijentami
Biełaruski biznes sihnalizuje pra toje, što praca ź Jeŭropaj ŭskładniajecca jašče bolš. Vialikija banki va ŭsioj Jeŭropie admaŭlajucca ad raboty i z tymi biełaruskimi dy rasijskimi bankami, jakija nie ŭklučany ŭ sankcyjnyja śpisy. «Niekatoryja vyklučeńni buduć mahčymy tolki ŭ vypadku, kali vypłaty buduć rabicca dla zabieśpiačeńnia krytyčna važnych dziaržaŭnych funkcyj, u humanitarnych metach i dla pryvatnych klijentaŭ — dla atrymańnia piensij», — patłumačyli «Našaj Nivie» ŭ SEB.
Swedbank u Vilni
«Litoŭcy, niemcy, italjancy, łatyšy — dy amal usie admaŭlajucca. Asabliva ŭpłyvaje na spravy pazicyja litoŭcaŭ, bo susiedzi — usie pracavali praź ich. A ciapier ni apłaty pravieści, ni pryniać samim. Navat kali ŭsio žyćcio mieŭ rachunki tolki ŭ Pryjorbanku», — kaža nam biznesmien, jaki raniej aktyŭna pravodziŭ apłaty praź Litvu.
«Čamu što adbyvajecca — niajasna. Na zvanki adkazvajuć, što admova pravodzić płaciažy tłumačycca ŭnutranym rašeńniem banka», — dadaje inšy.
«Imavierna, bujnyja jeŭrapiejcy trymajuć u pamiaci historyju francuzskaha banka BNP Paribas, jaki atrymaŭ štraf u 9 miljardaŭ dalaraŭ za parušeńnie sankcyjnaha režymu ŭ dačynieńni Irana i Kuby — i daviałosia płacić! Tamu ŭ hetaj situacyi, kali za try miesiacy prymajecca stolki sankcyjnych pakietaŭ, možna skazać, na kalency, ź niejkimi roznačytańniami i nieparazumieńniami, to vialikamu banku vidavočna praściej admovicca ad supracoŭnictva ź Biełaruśsiu całkam, bo chto jaho tam viedaje, jak rabotu buduć traktavać praź niejki čas. I zarobak dla hihantaŭ na rabocie ź biełaruskimi kampanijami nie taki vialiki.
Tamu nam i biznesu pakul što davodzicca šukać łaziejki ŭ maleńkich jeŭrapiejskich bankach, jakim nie vypadaje admaŭlacca ad prybytkaŭ chaj navat ad biełaruskich abarotaŭ. Ale, dumaju, trend na admovu chutka dojdzie i tudy», — kaža «Našaj Nivie» biełaruski bankir.
«Naša Niva» źviarnułasia ŭ dva bujnyja litoŭskija banki ź jeŭrapiejskim kapitałam: Swedbank i SEB. Jany tłumačać, što rašeńnie pryniata i biez aficyjnych jeŭrapiejskich sankcyj.
«U adpaviednaści z abaviazkami pa stvareńni finansava zdarovaj i ŭstojlivaj supolnaści i z ulikam pavieličeńnia kolkaści sankcyj suprać Rasii i jaje dziełavych kołaŭ, a taksama ŭ dačynieńni Biełarusi, vyrašyli zharnuć i spynić płaciažy ŭ luboj valucie ŭ i z Rasii i Biełarusi.
Palityka Swedbank u dačynieńni finansavych sankcyj praduhledžvaje, što bank prymaje rašeńnie nie apracoŭvać finansavyja apieracyi, kali takaja dziejnaść vychodzić za ramki dapuščalnaj ryzyki banka, navat kali heta dapuskajecca biahučymi zakonami i pałažeńniami ab sankcyjach», — patłumačyli «Našaj Nivie» ŭ Swedbank.
«Z 15 maja 2022 hoda SEB bank uvioŭ ahulnaje spynieńnie akazańnia pasłuh pa finansavych apieracyjach, źviazanych z płaciažami ŭ Rasiju i Biełaruś, i z Rasii i Biełarusi, va ŭsich valutach.
My pryniali hetaje rašeńnie praz ryzyki, źviazanyja z vajnoj va Ukrainie, i pavieličeńnie kolkaści sankcyj suprać Biełarusi i Rasii, ich hramadzian i kamiercyjnych pradpryjemstvaŭ.
14 maja było apošnim dniom dla ažyćciaŭleńnia płaciažoŭ. Kali paśla hetaha klijentam treba pravieści płaciež, raim źviarnucca ŭ inšuju finansavuju ŭstanovu.
Niekatoryja vyklučeńni buduć mahčymy tolki ŭ vypadku, kali vypłaty buduć rabicca dla zabieśpiačeńnia krytyčna važnych dziaržaŭnych funkcyj, u humanitarnych metach i dla pryvatnych klijentaŭ — dla atrymańnia piensij», — skazali ŭ SEB.
«Takija dziejańni ŭskładniajuć toj handal ź ES, jaki zastaŭsia, što viadzie da pahłybleńnia kałapsu ekspartu, ciažkaściaŭ u łakalnych biznesaŭ», — tłumačyć akademičnaja dyrektarka BEROC Kaciaryna Barnukova.
Na jaje dumku, takaja miera ŭdaryć pa ŭsim pryvatnym biełaruskim biznesie.
