Google «zdaŭ nazad»: rasijanie znoŭ zdolejuć płacić u prahramach
Google vyrašyŭ vykanać patrabavańnie rasijskich uładaŭ — dla rasijan zrabili vyklučeńnie i ciapier jany nie musiać płacić unutry prahram praz servisy, jakija padtrymlivaje Google.
Fota: google.com
Kampanija źmianiła praviły ažno 2 žniŭnia, ale stała viadoma pra heta tolki ciapier. U zajavie Google napisana, što ciapier praviły vykarystańnia apłatnaj sistemy Google Play nie raspaŭsiudžvajucca na tyja prahramy, jakija prymajuć płaciažy ŭ rasijan. To-bok ciapier jany mohuć prymać apłatu praz staronnija servisy — bolšaść prablem z apłataj dla rasijan vyrašanaja.
«Kali ŭ vas prablemy z atrymańniem płaciažoŭ, my rekamiendujem vykarystoŭvać alternatyŭny sposab apłaty, naprykład rachunak u inšym banku ci elektronny kašalok, na jaki možna adpravić płaciež», — udakładniaje Google.
Pry hetym, kab farmalna vykonvać sankcyi, Google Play błakuje zapampoŭku aficyjna płatnych prahram i abnaŭleńniaŭ dla ich u Rasii i Biełarusi. Ale ŭnutranaj apłaty heta nie tyčycca i ciapier, miarkujučy pa ŭsim, servisy «Jandeksa» ci rasijskija anłajn-kinateatry buduć pačuvacca svabodnymi ad sankcyj, jak i šarahovyja rasijanie.
Karparacyja vykanała patrabavańnie Fiederalnaj antymanapolnaj słužby (FAS), jakaja ŭ lipieni zapatrabavała ŭ Google na praciahu miesiaca dać rasijanam inšyja mietady apłaty. Kali b hetaha nie adbyłosia, FAS zaviała b spravu za parušeńnie antymanapolnaha zakanadaŭstva. Niadaŭna FAS užo aštrafavaŭ Google na 34 miljony dołaraŭ za toje, što YouTube moža vydalać akaŭnty karystalnikaŭ i byccam by takim čynam «złoŭžyvaje manapolnym pałažeńniem» na rynku videachostynhaŭ (vidać, za vydaleńnie akaŭntaŭ rasijskich prapahandystaŭ).
Nahadajem, karystalniki ajfonaŭ z Rasii zaŭždy mahli apłačvać pakupki ŭ abychod sankcyj — z dapamohaj bałansu mabilnaha telefona.