Pamior zabojca paštarki ŭ Oršy. U jaho pry zatrymańni stralali
Jak paviedamlaje orsha.eu, u reanimacyi pamior 71-hadovy mužčyna, jaki ŭ minułuju piatnicu zabiŭ paštarku, abakraŭ adździaleńnie i padpaliŭ jaho.
Budynak pošty, u jakim ździejśnili złačynstva
Padčas zatrymańnia ŭ mužčynu stralali. Padazravany lažaŭ u reanimacyi pad achovaj milicyi.
Aficyjnaha paćviardžeńnia infarmacyi pakul niama.
Trahiedyja ŭ Oršy adbyłasia 26 žniŭnia. U adnym z paštovych adździaleńniaŭ horada spracavała sihnalizacyja. Narad vyjaviŭ zadymleńnie i trup žančyny. Kamiery videanazirańnia źniali, jak nieviadomy zajšoŭ na poštu, zabiŭ rabotnicu i skraŭ hrošy. Kab schavać ślady złačynstva, jon padpaliŭ adździaleńnie.
U toj ža viečar mužčynu aryštavali, a pry zatrymańni pryjšłosia vykarystać tabielnuju zbroju. 71-hadovy padazravany byŭ paranieny i zamiest milicyi dastaŭleny ŭ balnicu.
Paviedamlałasia, što hety mužčyna byŭ nieadnarazova sudzimy. Jon, pavodle infarmacyi śledstva, zahadzia rychtavaŭsia da rabavańnia, tamu instrumient zabojstva ŭziaŭ z saboj, a kab jaho nie apaznali kamiery videanazirańnia, nadzieŭ masku i kiepku. Instrumient zabojstva mužčyna skruciŭ u skrutak, a kab paštaljonka vyjšła ŭ zručnaje miesca dla jaho prymianieńnia, mabyć, niešta paprasiŭ jaje pakazać z tavaru. Voś tady i nanios pracaŭnicy «Biełpošty» niekalki ŭdaraŭ małatkom pa hałavie, što i pryviało da śmierci. Na tryvožnuju knopku jana nacisnuć nie paśpieła.
