Biełarus ź invalidnaściu źjechaŭ za miažu. Praz 4 hady jaho abvinavacili ŭ niavypłacie padatkaŭ — i voś čamu im zacikavilisia padatkaviki
46-hadovy Siarhiej Hirkin maje invalidnaść druhoj hrupy. U 2018 hodzie jon źjechaŭ ź Biełarusi. Na radzimie mužčynu padtrymlivała niaŭradavaja arhanizacyja, jakaja paśla pratestaŭ akazałasia pad pieraśledam. Dniami jon daviedaŭsia, što jaho asudzili za ŭchileńnie ad apłaty padachodnaha padatku.
Siarhiej Hirkin
U sud na Siarhieja padała inśpiekcyja Kastryčnickaha rajona Mahilova. U sudovaj pastanovie skazana, što jon uchilaŭsia ad apłaty zapazyčanaści, ale detali nieviadomyja.
Siarhiej dapuskaje: pryčyna moža być u tym, što jon dapamahaŭ achvotnym vučyć polskuju movu. Za heta mieŭ padtrymku ad adnoj ź niaŭradavych arhanizacyj, jakaja ciapier pad pieraśledam. Jamu viadoma, što ŭ jaje ofisie i ŭ aktyvistaŭ adbyvalisia vobšuki, i apieratyŭniki mahli znajści jaho raśpiski. Jany i stali dokazam dachodu, ź jakoha nie zapłačany padatak.
Biez toj padtrymki, jak pryznajecca Siarhiej, jon by nie pražyŭ. Piensii ŭ 250 rubloŭ nie chapała na niatannyja leki i apłatu za žyllo. Invalidnaść mužčynu pastavili praź dziciačy cerebralny paralič.
Razam z tym juryst, da jakoha «Naša Niva» źviarnułasia, adznačyŭ, što dziejańni padatkavikoŭ jurydyčna apraŭdanyja.
U studzieni 2018 hoda Siarhiej pakinuŭ Biełaruś. Farmalna ŭ jaho zastajecca mahiloŭskaja prapiska, ale jon stała žyvie ŭ Polščy. U Mahilovie maje pałovu dvuchpakajovaj «chruščoŭki», jakuju dzielić z bratam.
Pa słovach Hirkina, pra sud jon daviedaŭsia za dzień da jaho pasiadžeńnia. Razhladzieli spravu 4 listapada. U pastanovie sudździ Taćciany Davydźka havorycca, što pretenzii padatkavikoŭ da Hirkina źjavilisia ŭ sakaviku 2022 hoda. Na 4 listapada jany naličyli zapazyčanaści na 1 480 rubloŭ, jakuju buduć vyličvać častkami ź piensii. A pakul Hirkinu sud abmiežavaŭ vyjezd za miažu i naviedvańnie hulniavych ustanoŭ.
Spahnańnie skasujuć, kali mužčyna vypłacić zapazyčanaść. Jaje buduć vyličvać ź piensii pa invalidnaści.
«Ja dapamahała Alaksandru Ryhoraviču stać prezidentam». Jak 72-hadovaja žančyna ź invalidnaściu 12 hod čakaje svaju čarhu na kvateru
U Polščy invalid achviaravaŭ kolki moh na Bajraktar dla Ukrainy. Ludzi zaŭvažyli heta i sabrali jamu samomu 17 tysiač dalaraŭ
