Žurnalistaŭ SNN i Sky News pazbavili akredytacyj za pracu ŭ Chiersonie nasupierak zabaronie
Niekalki zamiežnych žurnalistaŭ, u tym liku telekampanij CNN i Sky News, pazbavili akredytacyj z-za repartažaŭ z vyzvalenaha Chiersona. Raniej ŭkrainskija vajskoŭcy, spasyłajučysia na mierkavańni biaśpieki, prasili žurnalistaŭ nie śpiašacca z repartažami z Chiersona, jaki rasijskaja armija pakinuła na minułym tydni.
Kadr z repartažu Sky News
«Šerahu pradstaŭnikoŭ ŚMI, jakija parušyli praviły pracy ŭ rajonie viadzieńnia bajavych dziejańniaŭ, skasavany dazvoł na pracu, a ich pres-karty pryznanyja niesapraŭdnymi, — zajavili ŭ Hienštabie. — Niadaŭna niekatoryja pradstaŭniki ŚMI, ihnarujučy dziejnyja zabarony i zaściarohi, biez uzhadnieńnia z adpaviednymi kamandzirami i słužbami pa suviazi z hramadskaściu vajskovych čaściej ažyćciaŭlali infarmacyjnuju dziejnaść u horadzie Chiersonie jašče da zaviaršeńnia stabilizacyjnych mierapryjemstvaŭ».
Hienštab nie nazvaŭ ŚMI. Adnak krynicy «Detektar miedyja» paviedamlajuć, što dazvoł na pracu admianili prynamsi šaści žurnalistam zdymačnych hrup, u tym liku CNN i Sky News. Akramia ich u Chiersonie paśla adstupleńnia rasijskich vojsk pracavali zdymačnyja hrupy «Suśpilnaha» i «Hramadskaha». Pra namier pazbavić akredytacyi CNN i Sky News kazała pres-sakratarka Paŭdniovaha kamandavańnia Natalla Humianiuk.
«Zabarona isnuje dla ŭsich — jana była źmieščana na staroncy «Poŭdnia», pra heta paviedamili aficyjna. Pakul što praca ŚMI ŭ Chiersonie nie praduhledžvajecca ŭ suviazi ź niebiaśpiekaj», — papiaredžvała jana.
Karespandent CNN vychodziŭ u žyvy efir z adnoj z płoščaŭ Chiersona, dzie sabralisia śviatkavać adstupleńnie rasijskich vojskaŭ.
