Krainy Bałtyi adnadušna padtrymali Polšču, jakaja paciarpieła ad rasijskich rakiet, i patrabujuć rašučych krokaŭ
Ułady ŭsich troch krain Bałtyi — Litvy, Łatvii i Estonii — užo adnaznačna vykazalisia ŭ padtrymku Polščy, terytoryja i žychary jakoj paciarpieli ad rasijskich rakiet, i zajavili pra nieabchodnaść uzhodnienaha adkazu NATA.
Pieršym spačuvańni «polskim bratam pa zbroi» ŭžo prynios ministr abarony Łatvii Arcis Pabryks: «Maje spačuvańni našym polskim bratam pa zbroi. Złačynny rasijski režym vypuściŭ rakiety, jakija nacelenyja nie tolki na hramadzianskaje nasielnictva Ukrainy, ale i ŭpali na terytoryju NATA ŭ Polščy. Łatvija całkam padtrymlivaje polskich siabroŭ i asudžaje heta złačynstva», — napisaŭ Pabryks u tvitary.
Paśla Pabryks taksama dadaŭ:
«Majoj pieršaj reakcyjaj paśla taho, jak rasijanie ŭdaryli pa terytoryi Polščy, byŭ by 4 artykuł: zakryćcio i abarona pavietranaj prastory nad Ukrainaj».
U svaju čarhu, MZS Łatvii zajaviŭ: «Traplańnie rasijskich rakiet na terytoryju člena NATO — heta vielmi niebiaśpiečnaja eskałacyja z boku Kramla… Rasija budzie nieści poŭnuju adkaznaść za ŭsie nastupstvy».
Ułady Estonii taksama adreahavali na naviny ab padzieńni rakiet na terytoryi Polščy. «Estonija hatovaja abaraniać kožny dziujm terytoryi NATA. My całkam salidarnyja z našym blizkim sajuźnikam Polščaj», — havorycca ŭ zajavie MZS krainy.
Urešcie, prezident Litvy Hitanas Naŭsieda zajaviŭ: «Padtrymlivajem ciesny kantakt z našymi polskimi siabrami. Kožny dziujm terytoryi NATA pavinien być abaronieny!»
Darečy, akurat na zaŭtra pryznačanaja čarhovaja sustreča ministraŭ abarony krain NATA na amierykanskaj vajskovaj bazie «Ramštajn» u Hiermanii.
A reakcyja NATA na incydent u Polščy budzie zaležać ad zajaŭ Varšavy ab prynaležnaści rakiet, što ŭpali na jaje terytoryi, paviedamiła dypłamatyčnaja krynica ŭ Brusieli. Akurat u hety momant u Varšavie źbirajecca na pasiadžeńnie z hetaj nahody polski ŭrad.
