Va Ukrainie prakamientavali infarmacyju, što jana błakuje ŭdzieł Cichanoŭskaj u dypłamatyčnych mierapryjemstvach
Učora źjaviłasia infarmacyja, što Ukraina paśladoŭna błakuje ŭdzieł Śviatłany Cichanoŭskaj, a taksama pradstaŭnikoŭ biełaruskaha hramadstva ŭ sumiesnych mierapryjemstvach. Padobna da taho, što heta častka zakulisnych damoŭlenaściaŭ pamiž Kijevam i Łukašenkam ci sproba adhadać žadańni apošniaha.
Svajo mierkavańnie z hetaj nahody «Lusterku» vykazaŭ staršynia kamiteta Viarchoŭnaj Rady Ukrainy pa źniešniaj palitycy i mižparłamienckim supracoŭnictvie Alaksandr Miarežka.
«Ja nie dumaju, što Ukraina śpiecyjalna błakuje ŭdzieł Cichanoŭskaj u dypłamatyčnych mierapryjemstvach. Nasamreč heta pytańnie dypłamatyčnaha pratakoła. Dla taho, kab udzielničać u dypłamatyčnych mierapryjemstvach, treba mieć śpiecyjalny status. U dypłamatyčnych mierapryjemstvaŭ svaje praviły. I heta davoli niezvyčajna, kali ŭ ich udzielničaje chtości jašče, akramia pradstaŭnikoŭ dziaržaŭ. Choć u pryncypie zaprašeńnie haściej u niejkich asablivych vypadkach vyklučać nielha.
Adnosna taho, chto pradstaŭlaje biełaruskuju apazicyju, na maju subjektyŭnuju dumku, hetaje pytańnie jašče nie vyrašana kančatkova. Jość roznyja viersii. Naprykład, u nas abmiarkoŭvajecca pytańnie, kab takuju rolu na siabie ŭziaŭ połk Kalinoŭskaha. A čamu b i nie? U historyi byŭ taki precedent — ruch «Svabodnaja Francyja» Šarla de Hola. Ale heta majo asabistaje subjektyŭnaje mierkavańnie», — prakamientavaŭ Miarežka.
Dypłamatyčnyja krynicy: Ukraina błakuje ŭdzieł Cichanoŭskaj i biełarusaŭ u sumiesnych dypłamatyčnych mierapryjemstvach
«Znoŭ budzie iluzija». U Pierachodnym kabiniecie prakamientavali źviestki pra ihnaravańnie Ukrainaj Cichanoŭskaj
