Kancern Rheinmetall choča pabudavać tankavy zavod va Ukrainie
Niamiecki zbrojevy kancern Rheinmetall viadzie pieramovy ab budaŭnictvie tankavaha zavoda va Ukrainie. Pra heta zajaviŭ kiraŭnik kampanii Armin Papierhier, piša «Jeŭrapiejskaja praŭda» sa spasyłkaj na Spiegel.
Fota: Rheinmetall
«Zavod Rheinmetall moža być pabudavany va Ukrainie pryblizna za 200 miljonaŭ jeŭra», — zajaviŭ Papierhier.
Pavodle jaho, zavod moh by vyrablać da 400 asnoŭnych bajavych tankaŭ typu «Panther» za hod. Pieramovy z ukrainskim uradam jon nazvaŭ «šmatabiacalnymi». Papierhier spadziavajecca na rašeńnie «na praciahu nastupnych dvuch miesiacaŭ».
Panther — heta kancept novaha tanka, jaki kancern Rheinmetall pradstaviŭ letam 2022 hoda. Heta — raspracoŭka na asnovie Leopard 2, bolš zručnaja dla krain, jakija ŭžo majuć na ŭzbrajeńni «Leapardy». Ukraina, jak viadoma, u nastupnyja miesiacy moža atrymać pieršyja takija tanki ad sajuźnikaŭ.
Kiraŭnik Rheinmetall pierakanany, što zavod možna abaranić ad rasijskich pavietranych nalotaŭ. «Abarona z dapamohaj supraćpavietranaj abarony nie budzie składanaj», — skazaŭ jon.
Papierhier ličyć, što dla pieramohi Ukrainie treba ad 600 da 800 tankaŭ. «Navat kali Hiermanija admovicca ad usich 300 tankaŭ Leopard 2, jakija jość u Bundeśviera, hetaha ŭsio roŭna budzie zanadta mała», — skazaŭ jon.
Na siońniašni dzień Rheinmetall vypuskaje kala 250 tankaŭ. «My pracujem na poŭnaj chutkaści. My ŭžo ŭviali ŭ ekspłuatacyju bolš za 40 bajavych mašyn piachoty Marder, a da kanca hoda ich budzie kala 100. Z 50 tankaŭ Leopard 2A4 hatovyja kala 30. Taksama jość kala 100 starych madelaŭ Leopard 1, ź jakich my možam adnavić 88 mašyn», — skazaŭ Papierhier.
Jon ličyć, što vajna zaciahniecca, vierahodna, na hady. «Zachodnija sajuźniki dasyłajuć tudy dastatkova zbroi, kab Ukraina mahła abaranić siabie, ale siońnia ŭkraincy nie majuć dastatkova jaje, kab poŭnaściu advajavać svaju terytoryju», — rastłumačyŭ jon.
