U Łošyckaj siadzibie razabrali budynki brovara, choć abiacali nie čapać
Na hramadskim abmierkavańni pra taki varyjant rekanstrukcyi pomnikaŭ architektury nie było ni słova.
Łošycki brovar u 2023 hodzie. Fota: Anłajnier
Fotazdymki razabranych histaryčnych budynkaŭ byli apublikavany na telehram-kanale «Spadčyna».
U haspadarčy kompleks, pabudavany na miažy ChICh-XX st. na druhim bierazie Łošycy ad siadziby Lubanskich, uvachodziać dva budynki brovara (prajezd Čyžeŭskich, 5, vuł. Čyžeŭskich, 17) i były młyn (prajezd Čyžeŭskich, 6) — usie jany źjaŭlajucca historyka-kulturnymi kaštoŭnaściami.
Adzin z budynkaŭ brovara pa prajeździe Čyžeŭskich, 5 da rekanstrukcyi. Fota: Wikimedia Commons
Adzin z budynkaŭ brovara pa prajeździe Čyžeŭskich, 5 ciapier. Fota: Wikimedia Commons
Miarkujučy pa fota, była da padmurkaŭ razabranaja bolšaja dvuchpaviarchovaja častka budynka brovara pa prajeździe Čyžeŭskich, 5. Pry hetym najbolš kaštoŭnaja, čatyrochpaviarchovaja častka budynka zachavanaja.
Ad dvuchpaviarchovaha budynka pa vuł. Čyžeŭskich, 17 zastaŭsia cokalny pavierch i paasobnyja papiaročnyja ścieny.
Adzin z budynkaŭ brovara pa vuł. Čyžeŭskich, 17 da rekanstrukcyi. Fota: Wikimedia Commons
Reštki adnaho z budynkaŭ brovara pa vuł. Čyžeŭskich, 17 ciapier. Fota: telehram-kanał «Spadčyna»
Na budynku byłoha młyna pa prajeździe Čyžeŭskich, 6 taksama całkam źnieśli bolšuju dvuchpaviarchovuju častku, pakinuŭšy mienšuju, trochpaviarchovuju. Zachavanyja ścieny ściahnuli mietaličnymi ściažkami, a vakoł vyryli hłyboki katłavan, kab umacavać padmurki.
Rekanstrukcyja budynkaŭ brovara pačałasia za haradskija srodki paśla taho, jak ich nie ŭdałosia pradać na aŭkcyjonie. Zakazčykam prajekta vystupiła «Minskaja cpadčyna».
Rendar prajekta rekanstrukcyi kompleksa brovara ŭ Łošycy
Hramadskaje abmierkavańnie prajekta rekanstrukcyi brovara prajšło ŭ mai-červieni 2022 hoda. U 2023 hodzie ŭ inviestprahramie Minska prapisali nieabchodnaść vyłučyć $7,5 młn pa kursie na pracy.
Prajektam praduhledžvałasia, što ŭsie try budynki buduć rekanstrujavany i adrestaŭravany, budzie adnoŭleny frahmient aharodžy z ujaznoj bramaj i vieśničkami, stvorany miescy dla praviadzieńnia šlubaŭ na adkrytym pavietry, alei z raznastajnymi tematyčnymi placoŭkami i inšaje.
Budynak byłoha młyna da rekanstrukcyi. Fota: Wikimedia Commons
Budynak byłoha młyna ciapier. Fota: telehram-kanał «Spadčyna»
U adnym z budynkaŭ brovara (№17), pavodle prajekta, na płoščy 1500 m² musili źjaviccca handlovyja pamiaškańni, sałon pryhažości i kaviarnia. U inšym (№5) na płoščy 1650 m² — Dom šlubaŭ. Narešcie ŭ budynku byłoha młyna (№6) musiła źjavicca pradpryjemstva hramadskaha charčavańnia.
Ale nijakich zhadak u dakumiencie pra toje, što histaryčnyja budynki buduć źniesieny ci razabrany ŭ pradstaŭlenym prajekcie nie było. Adsutničajuć jakija-niebudź adpaviednyja paznaki i na prykładzienaj schiemie hienpłana.
Składvajecca ŭražańnie, što ad hramadskaści naŭmysna schavali važnuju infarmacyju, kab paźbiehnuć skandału da taho momantu, kali stanie zanadta pozna.
Cehła z razabranych pomnikaŭ. Fota: telehram-kanał «Spadčyna»
Cehła razabranych histaryčnych budynkaŭ składziena ŭ kuby na terytoryi budoŭli, vidać, jaje płanujuć vykarystać paŭtorna pry adbudovie. Zdać abnoŭlenyja abjekty płanujuć u 2025 hodzie.
Rendar prajekta rekanstrukcyi kompleksa brovara ŭ Łošycy
Na budoŭlu 2 krasavika z naradaj pryjechaŭ staršynia Minharvykankama Uładzimir Kucharaŭ, jaki daručyŭ aktyvizavać pracu na abjekcie, całkam adnavić zbudavańni, nie parušajučy ich histaryčnuju kaštoŭnaść i zachoŭvajučy aŭtentyčnaść. Ale aŭtentyčnaść razabranych pomnikaŭ stračana niezvarotna.
Heta daloka nie adziny prykład padobnaj rekanstrukcyi ŭ Minsku za apošnija hady. Zusim niadaŭna hetak ža, z zachavańniem usiaho nievialikaha kavałka fasada, byŭ «rekanstrujavany» dom Hurviča pa vuł. Revalucyjnaj, 6. Zakazčykam pa im vystupała ŭsio taja ž «Minskaja spadčyna».
«Naša Niva» — bastyjon biełaruščyny
PADTRYMAĆČytajcie taksama:
Na adnoŭlenaj viežy Lubčanskaha zamka ŭstalavali kupał FOTA
U Čyrvonym kaściole abiacali ŭ pieršym kvartale pačać budaŭničyja raboty. Što z hetym ciapier?
