Udar pa avijabazie Džankoj u Krymie moh być spravaj rakiet ATACMS
Dla ŭdaru byli vykarystanyja kala 12 apieratyŭna-taktyčnych rakiet ATACMS, pišuć rasijskija vajenkary. Ale rakiety ATACMS nie ŭžyvalisia USU ŭžo niekalki miesiacaŭ. Dyk što za jany i adkul?
Zdymak ilustracyjny. Fota: John Hamilton / U.S. Army via AP
Jak paviedamlałasia, u noč na sieradu ŭ akupavanym Krymie prahrymieli vybuchi ŭ horadzie Džankoj u rajonie vajskovaha aeradroma. Paśla hetaha tam pačalisia šmatlikija ŭzharańni.
Na aeradromie raźmieščany 39-y viertalotny połk 27-j źmiešanaj avijacyjnaj dyvizii 4-ha kamandavańnia VPS i SPA Paŭdniovaj vajskovaj akruhi armii Rasii, try avijacyjnyja eskadrylli.
Jak śćviardžaje rasijski telehram-kanał «Rybar», dla ŭdaru byli vykarystanyja kala dvanaccaci apieratyŭna-taktyčnych rakiet ATACMS, z vysokaj imaviernaściu zapuščanyja z boku Chiersonskaj vobłaści.
Nalot pravodziŭsia ŭ dźvie chvali. Pry pieršym udary było zadziejničana siem rakiet, miarkujučy pa ŭsim, z kasietnaj bajavoj častkaj, a ŭ druhoj — nie mienš za piać. Častka paškodziła techniku, jakaja staić na aeradromie, a častka — adzin z budynkaŭ.
«Rybar» śćviardžaje, što častku rakiet pierachapili sistemy SPA «Pancyr-S1» i S-400 — ale tolki častku, a niekatoryja dasiahnuli svaich celaŭ. Byli ŭražanyja składy haruča-zmazačnych materyjałaŭ i bojeprypasaŭ.
Što takoje ATACMS i ŭ čym ich siła
Balistyčnyja rakiety ATACMS raspracoŭvalisia z kanca 1970-ch hadoŭ, a ich bajavy debiut adbyŭsia padčas apieracyi «Bura ŭ pustyni» ŭ 1991 hodzie, dzie jany pakazali siabie jak vielmi efiektyŭnaja zbroja.
ATACMS farmalna adnosiacca da kłasa apieratyŭna-taktyčnych rakiet — razam z GMLRS, savieckimi «Točkaj U» i «Iskanderam» abo ŭkrainskaj «Volchaj».
Zapusk ATACMS, jak i GMLRS, adbyvajecca z puskavych ustanovak HIMARS i M270 MLRS. Tolki pry vykarystańni balistyčnaj rakiety zamiest puskavoha kantejniera z šaściu nievialikimi rakietami vykarystoŭvajuć kantejnier z adnoj vialikaj.
Vydzialajuć dva typy ATACMS.
Pieršy typ maje fuhasnuju bajavuju častku dla paražeńnia takich umacavanych celaŭ jak masty i bunkiery. Druhi typ asnaščany kasietnaj bojehałoŭkaj, jakaja pryznačanaja dla paražeńnia niebraniravanych celaŭ na vialikaj płoščy.
Vosieńniu 2023 hoda Ukraina atrymała ad ZŠA dalnabojnyja kasietnyja rakiety MGM-140A — heta varyjant ATACMS ź mienšaj dalnaściu palotu, ale vialikaj kolkaściu paražajučych subbojeprypasaŭ. Maksimalnaja adlehłaść, na jakuju zdolnyja nanieści ŭdar hetyja rakiety — 165 km.
Ekśpierty śćviardžajuć, što mienavita hetyja rakiety mahli być vykarystanyja dla ŭdaru. Pry pusku z navakollaŭ Chiersona Uzbrojenyja siły Ukrainy dastajuć imi da Džankoja.
Rakietny ŭdar pa aeradromie «Džankoj». Krynica: rybar / Telegram
Uličvajučy toj fakt, što rakiety ATACMS nie ŭžyvalisia USU ŭžo niekalki miesiacaŭ, vykazany zdahadki ab tym, što ZŠA pieradali Kijevu dadatkovuju partyju hetych taktyčnych rakiet, pry hetym, nie vyklučana, što havorka moža iści i ab madernizavanych rakietach MGM-140V z bajavym radyusam dziejańnia da 300 km.
Viadoma, što Ukraina prasiła ab ich pieradačy, i ab hetym vialisia dyskusii ŭ ZŠA, adnak aficyjnych paviedamleńniaŭ ab najaŭnaści va USU takich dalnabojnych rakiet nie było.
Čytajcie taksama:
Zialenski raskazaŭ, jak Ukraina prymienić dalnabojnyja rakiety ATACMS
U ZŠA stali mienš bajacca, što pieradača ATACMS Ukrainie raśćvialić Pucina
ZŠA daduć Kijevu dalnabojnyja rakiety ATACMS. Što viadoma i čamu heta važna
