Ihar Vasiljeŭ (sprava) i Mikałaj Ładućka na adkryćci piešachodnaha ŭčastka na vulicy Karła Markska ŭ Minsku. Maj, 2012. Fota Siarhiej Hudzilina.
Pa słovach sudździ Alachnovič, materyjały znachodziacca pad hryfam «sakretna». Niajasna, praces da kanca budzie zakrytym ci tolki pakul buduć razhladacca dakumienty.
4 studzienia na pracesie nad eks-namieśnikam staličnaha mera Iharam Vasiljevym adbyvaŭsia dopyt śviedkaŭ i pačałosia daśledavańnie materyjałaŭ kryminalnaj spravy (pieralik dakumientaŭ, što majucca i ahučvańnie, kali raniej ich nie začytvali).
Siarod dapytanych — były namieśnik mera Minska Alaksandr Barysienka, načalnik adździeła dakumientazvarotu i kantrolu kiraŭnictva spravaŭ Minharvykankama Śviatłana Nahornava. Apošniaja prysutničała pry zatrymańni Vasiljeva 6 lipienia 2012. U toj dzień jana znachodziłasia ŭ kabiniecie pamočnika namieśnika mera, kali ŭ supolnaj z Vasiljevym pryjomnaj źjavilisia nieznajomyja ludzi.
Adzin ź ich nie dazvoliŭ nikudy vychodzić, nie pradstaŭlaŭsia i zabaraniŭ telefanavać. Žančynu heta napałochała: «Usiakija dumki paleźli ŭ hałavu»,
— adznačyła jana. Maŭlaŭ, usie maładyja ludzi, ź vialikaj torbaj, ničoha nie kažuć. A paśla pačaŭsia ahlad kabinieta Vasiljeva.
Śviedka Dzianis Davydaŭ, jaki pracavaŭ u Kamitecie ekanomiki Minharvykankama, raskazaŭ pra farmalizm u pracy čynoŭnikaŭ. Jon taksama byŭ sakratarom Kamisii pa zaklučeńni inviestycyjnych damoŭ. Pa jaho słovach,
na pasiadžeńni kamisii pytańnie pra metazhodnaść budaŭnictva češskaha zavoda pa pierapracoŭcy śmiećcia nie razhladałasia. Chacia takoje rašeńnie zafiksavanaje ŭ admysłovym pratakole.
Davydaŭ adznačyŭ, što hetaje pytańnie ŭźnikła ŭ kancy pasiadžeńnia (u paradku dnia ŭvohule nie značyłasia), kali členy kamisii pačali źbiracca sychodzić. I nichto ničoha nie abmiarkoŭvaŭ, nie hałasavaŭ. A supracoŭniki harvykankama Jaromienka i Achromienka skazali jamu, kab paźniej zajšoŭ uzhadnić tekst pratakoła. I jany pradyktavali rašeńnie adnosna zavoda: maŭlaŭ, bačać metazhodnym jaho budavać.
Z ahučanych na sudzie dakumientaŭ stała zrazumieła, jakija hrošy Vasil Anańjeŭ prynios u kabiniet Vasiljeva — heta 250 tysiač dalaraŭ sa «śpiecyjalnych srodkaŭ» KDB.
Pry vobšukach na kvaterach Ihara Vasiljeva i jaho rodnych byli kanfiskavanyja kaštoŭnaści, juvielirnyja vyraby, źlitki (nie ŭdakładniałasia jakija — vierahodna, załatyja), patrony, pistalet z dazvołam na jaho, bankaŭskija kartki...
Była začytanaja charaktarystyka Mikałaja Ładućki na Vasiljeva.
«U kanfliktnych situacyjach vytrymany», ale «brakuje nastojlivaści i samastojnaści» ŭ pryniaćci rašeńniaŭ.
Z charaktarystyki vynikaje, što razhladałasia pytańnie pra pieravod namieśnika mera na inšuju pasadu ź mienšym abjomam pracy.
Hladzicie taksama:
Sud nad namieśnikam kiraŭnika Minska: «Prajaviŭ słabaść i pahadziŭsia na atrymańnie hrošaj»
