Polski jeŭradeputat Marek Mihalski padtrymaŭ pietycyju pa ablahčeńni vizavaha režymu pamiž Biełaruśsiu i Jeŭrasajuzam i taksama zaklikaŭ biełaruskija ŭłady pačać pieramovy ź ES pa pytańniach spraščeńnia vydačy viz dla biełarusaŭ, paviedamili ŭpres-słužbie jeŭraparłamientaryja.
Mihalski zajaŭlaje, što takija dziejańni biełaruskaha kiraŭnictva, jak «parušeńnie pravoŭ čałavieka, abmiežavańnie hramadzianskich svabod, pryhniot apazicyjanieraŭ i niezaležnych žurnalistaŭ», vymušajuć ES uvodzić vizavyja sankcyi suprać biełaruskich čynoŭnikaŭ.
Jak adznačajecca ŭ zajavie, ES adkryty dla dyjałohu z hramadstvam i zaklikaje spraścić praceduru vydačy viz dla biełarusaŭ, adnak «Alaksandr Łukašenka niaspynna ihnaruje hetyja zakliki i dziejničaje na škodu svajmu narodu».
«Ja ŭpeŭnieny, što ablehčany vizavy režym dla biełarusaŭ moža sadziejničać realizacyi demakratyčnych pracesaŭ u Biełarusi. U suviazi z vyšejskazanym ja poŭnaściu padtrymlivaju pietycyju biełaruskich hramadzian», — pryvodzić słovy Mihalskaha jaho
pres-słužba .
Zbor podpisaŭ pad pietycyjaj da ŭład z patrabavańniem pačać pieramovy ź Jeŭrasajuzam pa pytańni spraščeńnia vizavaha režymu pačaŭsia ŭ studzieni hetaha hoda na bazie hłabalnaj sietkavaj płatformy change.org. Aŭtaram pietycyi vystupiŭ Alaksandr Vialitčanka, adličany ŭ lutym minułaha hoda ź Minskaha dziaržaŭnaha linhvistyčnaha ŭniviersiteta paśla ŭdziełu ŭ akcyi salidarnaści ź lidaram «Maładoha frontu» Dźmitryjem Daškievičam.
U pietycyi adznačajecca, što Biełaruś užo šmat hadoŭ źjaŭlajecca lidaram pa kolkaści atrymanych šenhienskich viz. Spraščeńnie vizavaha režymu dazvolić pasolstvam chutčej apracoŭvać chadajnictvy, sprościć praces ich padačy, źnizić košt vizy z 60 da 35 jeŭra.
Na siońnia sabrana kala 4 tys. podpisaŭ i praces praciahvajecca.