Apazicyja moža pryjści da pieramohi, tolki kali ŭ Biełarusi budzie źmienieny maralny klimat, miarkuje sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec.
«Naša stratehičnaja zadača — stvareńnie maralnaj bazy dla pieramien. Heta vielmi surjoznaja reč», — zajaviŭ jon 20 kastryčnika ŭ Minsku žurnalistam.
Pavodle słoŭ Sieviarynca, ciapier «sto tysiač čynoŭnikaŭ prapaviedujuć padman, strach, kradziež jak normu». «Na hetym pabudavać ničoha nielha, navat kali źmianić prezidenta i deputataŭ. Tamu nam treba rychtavać minimum sto tysiač sumlennych prafiesijanałaŭ, jakija buduć hatovyja ŭziać adkaznaść na siabie», — zajaviŭ jon.
Sieviaryniec miarkuje, što «klučavymi strukturami, arhanizavanaj supolnaściu, niepadkantrolnaj dziaržavie, u jakoj jość nieabchodnaja kolkaść prafiesijanałaŭ, źjaŭlajucca cerkvy».
«Heta supolnaść dla nas — najvažniejšaja metavaja hrupa. Carkva mahła b źmianić maralny klimat u Biełarusi. Apazicyja siońnia prosta nie moža vyłučyć takuju kolkaść prafiesijanałaŭ», — skazaŭ jon.
Palityk taksama paviedamiŭ, što BCHD hatova «vystupić abjadnalnaj siłaj» u apazicyi.
«Davajcie abjadnoŭvacca, rabić adzinuju kamandu i stratehiju, z dapamohaj hetaha adzinstva pieramahać», — skazaŭ jon.
Sievieryniec zaznačyŭ, što biełaruskija chryścijanskija demakraty na minułych miascovych vybarach praviali ŭ saviety troch čałaviek. «Takija ludzi, biezumoŭna, buduć i na hetych vybarach. Ale va ŭmovach falsifikacyj prosta niemahčyma, kab usie, chto pieramoh u realnaści, atrymaŭ deputackija mandaty. Tamu taktyka BCHD budzie takoj: za tydzień da vybaraŭ my abjavim, što jak palityčnaja siła ŭ falsifikacyjach brać udzieł nie možam i nie budziem. My vybrali svaich narodnych deputataŭ, jakija pracujuć ź ludźmi, jany buduć aktyŭna dziejničać u svaich akruhach. Na hety momant u nas hatovyja vyłučacca kandydatami ŭ deputaty miascovych savietaŭ prykładna 200 čałaviek», — paviedamiŭ jon.
«Meta našych bližejšych dziejańniaŭ — uzmacnieńnie i BCHD, i ŭsich demakratyčnych sił pierad prezidenckimi vybarami 2015 hoda. Kali nie rychtavacca da 2014 hoda da kampanii 2015 hoda, to zatym usio pravalicca», — padkreśliŭ Sieviaryniec.
