Prezident Kazachstana Nursułtan Nazarbajeŭ u svaim vystupie na samicie Mytnaha sajuza kanstatavaŭ najaŭnaść niedachopaŭ u pracy Jeŭrazijskaj ekanamičnaj kamisii. Taksama jon źviarnuŭ uvahu na nieabchodnaść likvidacyi dziejnych abmiežavańniaŭ u Mytnym sajuzie.
Ale samaj cikavaj jaho prapanovaj stała «padklučeńnie» da Mytnaha sajuza Turcyi. Jak viadoma, hetaja kraina imkniecca ŭstupić u Jeŭrasajuz.
«Prezident Turcyi źviarnuŭsia da mianie z prośbaj ustupić u naš Mytny sajuz. Davajcie i prymiem Turcyju», — skazaŭ Nazarbajeŭ.
Za miažoj, skazaŭ Nazarbajeŭ, da jaho časta źviartajucca z pytańniem ab tym, što «my stvarajem SSSR ci niešta pad Rasijaj».
«Moža, Turcyju pryniać, vialikaja kraina, i razmova skončycca», — prapanavaŭ Nazarbajeŭ prezidentam Rasii i Biełarusi.
Kazachstan zacikaŭleny ŭ jeŭrazijskim uchile intehracyjnaha abjadnańnia. Prapanova Nursułtana Nazarbajeva dałučyć da Mytnaha sajuza Turcyju charakternaja ŭ hetym sensie. Kanstrukcyja z udziełam vialikaj ciurkamoŭnaj krainy pieratvaryła b sajuz z rekanstrukcyi byłoha SSSR u situacyjny aljans słavianskich i ciurkskich dziaržaŭ.
Taksama prezident Kazachstana prapanavaŭ raspuścić Jeŭrazijskuju ekanamičnuju supolnaść. Adnak prezident Rasii Uładzimir Pucin zaklikaŭ nie śpiašacca ź likvidacyjaj JeŭrAzES.
